3 qazan kúni Shyǵys Qazaqstan oblystyq aýrýhanasynda qaıtys bolǵan donordyń aǵza músheleri tórt pasıentke sátti transplantasııalandy, dep jazady Egemen.kz.
Densaýlyq saqtaý mınıstrliginiń málimetinshe, 39 jastaǵy donordyń mıy jumysyn toqtatqannan keıin týystary kelisip, aǵzalary tórt adamǵa berilgen. Donordyń júrek, ókpe jáne eki búıregi muqtaj naýqastarǵa berilgen. Máselen, 1977 jyly týǵan er adamǵa júrek, 1962 jyly týǵan áıelge ókpe, 2015 jyly týǵan balaǵa búırek, al 1966 jyly týǵan áıelge ekinshi búırek transplantasııalanǵan.
Osylaısha donor tórt azamattyń ómirin saqtap qalýǵa sep boldy.
«Pasıentter Densaýlyq saqtaý mınıstrliginiń Transplantattaýdy úılestirý jónindegi respýblıkalyq ortalyǵynyń respýblıkalyq, óńirlik jáne stasıonarlyq transplantattaý úılestirýshileriniń jáne «University Medical Center» KQ, «Ulttyq ǵylymı onkologııa ortalyǵy» JShS transplantattaý ortalyqtary mamandarynyń úılesimdi komandasynyń arqasynda «ekinshi ómirge» múmkindik aldy», delingen mınıstrlik habarlamasynda.