Grant ıegerleri anyqtaldy

Jumys tobynyń sheshimimen 21 qatysýshynyń arasynan jartylaı fınalǵa 10 úmitker iriktelgen. Olardyń jobasy óńirlik brend-komıtet keńesinde qaralyp, 4 úzdik joba respýblıkalyq jáne halyqaralyq kórmelerge joldama aldy. Olar jobanyń erejesine sáıkes bıznesti bastaý men damytýǵa 5 mln teńgege deıin memlekettik grant alý múmkindigine ıe boldy. Sonymen birge elektrondyq kommersııany oqytý, ózderi shyǵaratyn ónimniń tusaýkeserin uıymdastyrý, mamandar tarapynan bıznesti órkendetý jóninde usynystar berilip, tolyq marketıngtik qoldaýǵa qol jetkizdi.

«Bir aýyl – bir ónim» kórme-jár­meńkesi – oblystyq kásipkerler palata­synyń JICA halyqaralyq ynty­maq­tastyq jónindegi japon agenttigimen birlesip júzege asyryp jatqan joba­lardyń biri. Japon eliniń bilikti ma­mandary atalǵan jobanyń damýy­na jan-jaqty úles qosyp, tamaq resep­terin usyný men marketıng júrgizýde qolǵabys etip otyr. Bastapqy satyda ekenimiz belgili, biraq basqa elder tájirıbesine qaraıtyn bolsaq, joba­nyń áleýeti zor», deıdi Abaı oblysy kásipkerler palatasynyń dırektory Maqsat Ánýarbekuly.

Memlekettik grant ıegeri atan­ǵan tórttiktiń biri – aǵashtan jasal­ǵan buıymdary týrısterdiń qyzyǵý­shy­lyǵyn týdyrǵan, semeılik sheber Aıdar Elýbaev. Bilikti usta mektepte «Eńbek» páninen sabaq berip, ulttyq mýzykalyq aspaptardy, eski kólikterdi, erekshe kádesyılardy jasaıdy. Otyz jylǵa tarta qolónermen aınalysqan ol alǵashynda bul istiń jaı ǵana qyzyǵýshylyq bolǵanyn, su­ra­nys kóbeıgen soń, óz qolynan ja­sal­­ǵan buıymdardy saýdaǵa shyǵara bas­­ta­ǵanyn aıtady. Ártúrli kádesyı dú­kenderi men Máskeý qalasynan túsken kom­mersııalyq usynys kásipke moıyn bur­ǵyzyp, bızneske birjola kelgen.

Joba fınalyna shyqqan jeke kásipkerdiń biri – Raýshan Murathanqyzy. «Adal As» atymen tanylǵan onyń kásiporny 15 jyldan beri 100-den astam ónim túrin shyǵaryp keledi. Jobanyń taǵy bir jeńimpazy, kórme tamashalaý­shylardy tańǵaldyrǵan ónim avtory – Maqsat Kóshebaev. Maldyń tezegi men kóńinen kómir jáne óńdelgen mal azyǵyn jasaıtyn jeke kásipker Abaı oblysy Aqsýat aýdanyndaǵy Ekpindi aýylynda ekologııalyq otynnyń jańa túrin oılap tapqan. Arnaıy stanok oılap ta­ýyp, bıyl jobaǵa ekinshi márte qatysyp otyr. Ekologııany taza ustaý men tazartý maqsatynda jańa bastamaǵa kirisken onyń oıy maquldanyp, grant ıelendi.

Jańa bastamalar men jobalarǵa baǵa berýshilerdiń nazaryn aýdaryp, memlekettik qoldaýǵa ıe bolǵan jeke kásipkerdiń biri – Gúlmıra Aıǵojına. Kıiz buıymdaryn óńdeýdi meńgergen maman ıesi brend-komıtettiń joǵary baǵasyna ıe bolǵan. Ol ulttyq naqysh­taǵy kilem men baskıim, basqa da tabıǵı buıymdar jasaıdy. Balalar úıinde qosymsha bilim beretin Gúlmıra óz isin úıretip, talapty jandarǵa tabys tabýǵa da kómektesip júr.

Shalǵaıdaǵy kásipkerler men aýyl turǵyndarynyń kásipkerlik áleýetin arttyrý, olardyń ál-aýqaty men ómir súrý deńgeıin jaqsartý maqsatynda qolǵa alynǵan joba aldaǵy ýaqytta da memlekettik granttar usynyp, el ekonomıkasyn jaqsartýǵa úles qosady degen úmit basym.

Abaı oblysy