Jaqynda bilim salasyndaǵy úzdik jetistigi úshin Memleket basshysynan marapat alǵan muǵalimniń kóńili bosap, kóz jasyna erik bergen sáti áleýmettik jelide keńinen taraǵan edi. «Qazaqstannyń eńbek sińirgen ustazy» atanǵan Abıbýlla Myńasaruly – qyryq jyldan astam eńbek ótili bar aǵylshyn tili pániniń muǵalimi.
Memleket basshysy Abıbýlla Jakýdaevpen qatar 24 muǵalimge «Qazaqstannyń eńbek sińirgen ustazy» ataǵyn tapsyrdy. Sonda Prezıdent muǵalimniń mártebesi qashanda bárinen bıik ekenin aıta kelip: «Uly tulǵalardyń ózi ustazynyń aldynda shákirt bolyp qala beredi. Bir sózben aıtsaq, barsha jetistiktiń bastaýynda ustaz tur. Ulttyń bolashaǵy – ustazdyń qolynda. Meniń maqsatym – ustazdy qoǵamymyzdyń basty keıipkeri retinde dáripteý. Muǵalimderdiń tabandy eńbekteri erekshe qurmet pen joǵary marapatqa laıyq», dedi.
Alty júzden astam oqýshyny olımpıadaǵa daıyndap, talaı talanttyń tomaǵasyn sypyrǵan Abıbýlla Myńasaruly osy kúni Túrkistan oblysy, Ordabasy aýdany, Temirlan aýylyndaǵy Shoqan Ýálıhanov atyndaǵy mektep-gımnazııada qyzmet etedi.
– Bul ataq – men úshin tek joǵary marapat emes, eń áýeli úlken jaýapkershilik. Etken eńbektiń elengeni, árıne, kóńil qýantady. Sondaı-aq maǵynaly qyzmetti jalǵastyrýǵa qulshynysymdy arttyrdy. Ushaqtan túsken sátte qýanyshymdy bólisýge kelgen áriptesterimniń, shákirtterimniń janaryndaǵy otty kórip, ótken kúnder esteligi júregimdi terbep, kózimnen jas bolyp yrshyp shyqty. Ol sezimdi sózben aıtyp jetkizý tipti múmkin emes. Jıyrma jyl buryn anam men zaıybym ómirden ozdy. Odan keıin otaý qurmadym. Qos qyzymdy qos qarashyǵymdaı saqtap, ósirdim. Sonyń bári sol sátte oıǵa oralyp, kóńil tolqytqany ras, – deıdi A.Jakýdaev.
Taǵdyrdyń taýqymetine taısalmaǵan Abıbýlla Myńasaruly bul kúni talaı shákirttiń súıikti ustazy. Kásibı maman ár balanyń júreginen oryn taýyp, pánge degen qyzyǵýshylyǵyn oıatýdyń ózi tájirıbemen keletinin aıtady.
– Eńbek jolyn endi bastaǵan pedagogterge aıtar basty keńesim – osy bastan oqytýdy tek aqparat jetkizý dep qaramaı, oqýshylarmen tyǵyz baılanys ornatyp, árqaısysynyń jeke ereksheligin eskerý qajet. Júsip Balasaǵunnyń «Árbir bala – bir juldyz, jarqyraýyna járdem et» degeni osyndaıda oıǵa oralady. Sondyqtan ustaz shákirtterine árkez jyly shyraı men shydamdylyq tanytyp, izdenis ústinde júrýge tıis. Bala seni moıyndamasa, sen pedagog emessiń. Ol moıyndaý jaqsy sabaq berýińmen ǵana kelmeıdi. Sóıleý mánerińnen bastap, júris-turysyń, oı-órisiń bári kózge kórinbeı, balaǵa sińip jatatyn rýhanı nár. Sonyń birinen qur alaqan bolsań, ustazdyq tulǵańa min. Árbir balanyń ishki jan dúnıesin túsiný, qoldaý kórsetý, qajettilikterine nazar aýdarý arqyly jasóspirimderdiń boıyndaǵy agressııany azaıta alamyz. Jaqsy oqýshyny janymdaı kóretin ádetim. Qıyn klasyń qımas klasyńa aınalatyn kezder de bolady. Azamat bolyp, ómirden óz ornyn tapqan oqýshylaryńdy kórgende, boıyńdy qýanysh bılep, máz bolasyń. «Eńbek esh ketken joq» deımiz osyndaıda. Áli kúnge deıin ózimniń Bolat Qojageldıev, Rýslan Kenjebekov, Baqytjan Tórehanov syndy oqýshylarymmen maqtanamyn. Olar qazir álemdik kompanııalarda bedeldi qyzmet atqarady, – dedi ol.