Roza Baǵlanova atyndaǵy «Qazaqkonsert» memlekettik akademııalyq konserttik ujymynyń «Astana sazy» qazaq memlekettik folklorlyq ansambli Qazaqstan men Ispanııa arasyndaǵy strategııalyq áriptestiktiń 15 jyldyǵy, elimizdiń Respýblıka kúnin merekeleý aıasynda Madrıd qalasynyń úzdik konserttik zalynda óner kórsetti.
«Astana sazy» Qazaq memlekettik folklorlyq ansambli – elimizdiń jetekshi shyǵarmashylyq ujymdarynyń biri. Folklorlyq ansambl mýzykanttary tyńdaýshylardy dombyra, qobyz, sherter, shańqobyz, sazsyrnaı, sybyzǵy, asataıaq, daýylpaz, tuıaqtas, qońyraý, t.b. halyq mýzykalyq aspaptarynyń únimen tanystyryp keledi. Ansambldiń kórkemdik jetekshisi – Nurken Iаqııaev.
Ansambl otandyq mýzyka salasynda ózindik orny bar, kórermen tarapynan zor suranysqa ıe úzdik ujym retinde «Qazaqkonserttiń» brendine aınaldy. «Astana sazy» tyńdaýshylarǵa halyq shyǵarmashylyǵynyń ulttyq boıaýyn saqtaı otyryp, zamanaýı óńdeýlerin usynyp júr.
«Astana sazy» ansambliniń repertýary túrli halyqtyń dástúrli aspaptyq mýzykasyna jáne zamanaýı avtorlyq shyǵarmalarǵa baı. Ujym ártisteri Tájikstan, О́zbekstan, Qyrǵyzstan, Taıaý Shyǵys elderinde óner kórsetip, kóptegen is-sharaǵa belsendi qatysyp keledi.
Qazaq halyq shyǵarmashylyǵynyń damýyna, dáriptelýine zor úles qosyp júrgen ansambl jınalǵan qaýym nazaryna ulttyq ónerimizdiń jaýharlary men óz repertýaryndaǵy tanymal shyǵarmalaryn usyndy. Bul rýhanı kesh – Madrıd qalasyndaǵy erekshe mádenı oqıǵa ǵana emes, sonymen qatar Qazaqstan men Ispanııa arasyndaǵy shyǵarmashylyq baılanystardy nyǵaıtýǵa baǵyttalǵan mańyzdy qadam bolǵany sózsiz.