Jetisý oblysynyń birqatar aýyly kópten kútken tabıǵı gazǵa qol jetkizdi. Taldy aýylynda buryn-sońdy bolmaǵan saıabaq halyq ıgiligine berildi. Al Kóksý aýdanynyń Balpyq bı, Jarlyózek aýyldaryndaǵy 17 úıdiń qurylysy aıaqtalyp, kilti turǵyndarǵa tabystaldy.
Qaratal aýdanyna qarasty Kókpekti aýylyna tabıǵı gaz jetip, alǵashqy otbasy kógildir otynǵa qosyldy. Saltanatty is-sharaǵa aýdan ákiminiń orynbasary Maqsat Chamırenov, «JetisýGazServıs» О́K» KMK-nyń basshysy Mıras Qojahmetov qatysty.
«Otbasymyzben Taldyqorǵan qalasynan týǵan aýylymyzǵa kóship keldik. Aýylymyz jaınap, órkendep keledi. Júrgizilip jatqan gazdandyrý jumystary kóz qýantady. Buǵan deıin kómir men otyn satyp alatynbyz. Pesh jaǵyp, kúl shyǵarý ońaı jumys emes. Bul úıdegi tazalyqqa da áser etedi. Kógildir otynmen qamtamasyz etken memleketke, oblys, aýdan basshylyǵy men kompanııaǵa rızashylyǵymyzdy bildiremin», deıdi aýyl turǵyny Danııa Tóleýbergenova.
Qaratal aýdanynda 35 eldi meken bolsa, onyń 19-y gazdandyrýǵa jatady. Aýdanda Úshtóbe gaz taratý stansasy salynǵan. Búginde 11 eldi mekende gaz taratý jelileriniń qurylysy aıaqtalǵan. Sonymen qatar aýdandaǵy 3 aýylda gazdandyrý jumysy júrip jatyr. Bul eldi mekenderdi gazǵa qosý jumysy jyl sońyna deıin kezeń-kezeńimen júzege asyrylady. О́ńirdegi iri jobalardyń biri – Úshtóbe qalasyn gazdandyrýǵa respýblıkalyq bıýdjetten 7 mlrd teńge bólingen. Jumystardy aıaqtaý merzimi – 2024 jyldyń aıaǵy. Jobalardy júzege asyrý nátıjesinde 2025 jyldyń sońyna deıin Qaratal aýdanyndaǵy 19 eldi meken kógildir otynǵa qol jetkizedi.
Búginde oblysta gazdandyrý deńgeıi 51,1 paıyzdy qurap otyr. Memleket basshysynyń Jetisý oblysyna kelgen saparynda bergen tapsyrmasy aıasynda jergilikti syzbaǵa sáıkes 2025 jyldyń sońyna qaraı Kerbulaq aýdanynan Taldyqorǵan qalasyna deıin, sonyń ishinde Panfılov aýdanyn qosa alǵanda, barlyǵy 126 eldi meken gazdandyrylyp, jalpy 506 myń adam kógildir otynnyń ıgiligin kóretin bolady. Sóıtip, 2025 jyldyń sońynda oblysta gazdandyrý deńgeıi 72%-ǵa jetedi dep mejelenip otyr.
Jobanyń ekinshi kezeńinde Aqsý, Sarqan, Alakól aýdandaryn gazdandyrýǵa qajetti «Taldyqorǵan – Úsharal» magıstraldy gaz qubyry qurylysynyń JSQ-sy ázirlendi. Qurylys jumysy bıylǵy jyldyń ekinshi jartysynda bastalady dep josparlanǵan. Osy kezeńde atalǵan 3 aýdandaǵy 66 eldi mekenge gaz qubyry tartylady. 2028 jyldyń sońyna qaraı oblysta gazdandyrýǵa jatatyn 124 myńǵa jýyq turǵyny bar 192 eldi meken tolyq gazdandyrylady.
Panfılov aýdanynyń Taldy aýylynda saıabaq ashyldy. Demeýshiler esebinen jasalǵan saıabaqtyń aýmaǵy 1 gektardy quraıdy. Aýylda 2 200-den astam adam turady. Jergilikti azamattar týǵan jerin kórkeıtýge atsalysý maqsatynda aýylǵa saıabaq jasap bergen. Demalys ornynyń saltanatty ashylýyna aýyl jurtshylyǵy qatysty. Saıabaq ishinde sporttyq alańdar, balalardyń oıyn alańdary, sýburqaq, konserttik sahna ornatylǵan. Zamanaýı úlgidegi jaryqtar, oryndyqtar qoıylǵan, 280 túp arsha aǵashy otyrǵyzylǵan. Sondaı-aq alańdarda arnaıy jabyn tóseletin bolady.
Kóksý aýdanynyń Balpyq bı, Jarlyózek aýyldarynda 17 úıdiń kilti turǵyndarǵa tapsyryldy. Saltanatty sharaǵa Kóksý aýdanynyń ákimi Dáýlet Halelov qatysyp, turǵyndardyń qýanyshymen bólisti.
«Jyl basynda 10 500 sharshy metr úıdi qoldanysqa beremiz dep josparlaǵanbyz. Búginge deıin 7 500 sharshy metr úı tapsyryldy. Qalǵany jyl sońyna deıin oryndalady. Kelesi jyly taǵy da 50 úıdiń kiltin tapsyrsaq degen jospar bar. Sonymen qatar «Otbasy bank» arqyly tómendetilgen paıyzben 40 otbasy baspanaly bolsa, aldaǵy ýaqytta taǵy da 20 páter óz ıesin tappaq. Qyrkúıek aıynda Qaratal aýylyndaǵy jańa mektep qoldanysqa berilip, jańa balabaqsha baldyrǵandardy qýanyshqa bóledi. Bıyl 17 aýyldyń turǵyny tabıǵı gazǵa qosylady», dedi aýdan ákimi.
Bıyl 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy sheńberinde Kóksý aýdany halyqtyń áleýmettik osal toptarynan shyqqan 50 otbasyn turǵyn úımen qamtamasyz etýdi josparlaǵan. Oǵan bıýdjetten 840 660 000 teńge bólinip, Balpyq bı, Jarlyózek, Muqyry aýyldarynda jalpy aýdany 60 sharshy metrdi quraıtyn jalǵa beriletin, jeke turǵyn úı salý, satyp alý jóninde kásipkerlermen kelisimge kelgen. Balpyq bı aýylyndaǵy 23 jeke turǵyn úı qurylysyn «Smart Taldykorgan» JShS, 7 úıdi «Kazakhstan grand Construction» JShS, Jarlyózek aýylyndaǵy 10 úıdi «Vostok Stroı Enerdjı» JShS, Muqyr aýylyndaǵy 10 úıdi «Kóksý proekt» JShS júrgizetin bolyp belgilengen. Mine, sonyń 17 úıi, Balpyq bı aýylyndaǵy 13, Jarlyózek aýylyndaǵy 4 úıdiń qurylysy aıaqtalyp, úı kezeginde turǵan otbasy ıelerine tapsyryldy. Qalǵan úıler jyl sońyna deıin ıesin tabady.
Balpyq bı aýylynyń №14, Jarlyózek aýylynyń Bıǵaısha Qundaqbaeva kósheleriniń boıyna ornalasqan úılerdiń saltanaty erekshe. Syrtqy kelbeti, ishki bezendirilýi birdeı ári tózimdi materıaldan salynǵan. Qurylystyń sapaly ekeni kórinip tur. Qorshaýlary retti, aýlasy taza, sý, jylý jelileri tolyq tartylǵan úıler qonys ıeleriniń kóńilinen shyqty.
«Úı kezeginde turǵanyma 10 jyldan asty. Ǵumyr boıy ustazdyq jumys istep, 5 balamdy er jetkizdim. Nemerelerim de ósip keledi. Osyǵan deıin jubaıymmen balalarymyzdyń úıinde turyp keldik. Mine, endi jańa baspanaǵa ıe bolǵanyma qýanyshtymyn. Aýyldarymyz kógildir otynǵa da qosylyp jatyr», dedi Balpyq bı aýylynyń turǵyny, zeınetker Áýesbala Omarova.
Jetisý oblysy