Portýgalııanyń Kashkaısh qalasynda Ulttyq olımpıada komıtetteri qaýymdastyǵynyń (UOKQ) HHVII Bas Assambleıasy ótip jatyr.
Sessııaǵa álemniń túkpir-túkpirindegi Olımpıadalyq qozǵalystyń 288 uıymy, onyń ishinde 200 UOK, Halyqaralyq Olımpıada komıteti delegattary, Halyqaralyq federasııalar men Olımpııa oıyndaryn uıymdastyrý komıtetteriniń ókilderi qatysyp jatyr. Elimizdiń atynan Portýgalııaǵa Ulttyq Olımpıada komıtetiniń prezıdenti Gennadıı Golovkın men UOK bas hatshysy Álimjan Aqaev bardy.
UOKQ Bas Assambleıasynyń maqsaty tikeleı dıalog arqyly sessııaǵa qatysýshylar arasyndaǵy yntymaqtastyqty nyǵaıtý bolyp sanalady. Assambleıa jumysy barysynda qaýipsiz sportty damytýǵa arnalǵan tıimdi strategııalar, UOK-tiń bolashaǵy, olımpıada baǵdarlamasyndaǵy evolıýsııa syndy taqyryptarǵa kóńil bólinip, sport salasynda jasandy ıntellekt quraldaryn paıdalanýdyń bolashaqtaǵy róline baǵa berildi.
UOKQ Bas Assambleıasy aıasynda Gennadıı Golovkın Birikken kúres álemi (UWW) basshysy Nenad Lalovıchpen, Halyqaralyq gımnastıka federasııasynyń prezıdenti (FIG) Morınarı Vatanabemen, Halyqaralyq aýyr atletıka federasııasyn (IWF) basqaratyn Mohammed Djalýdpen, Túrkııa, Fransııa Ulttyq Olımpıada komıtetteri prezıdentterimen, ózge UOK ókilderimen kezdesti.