Jetisý oblysynda shalǵaıdaǵy Kópbirlik aýylyna aparatyn joldyń jóndeýi aıaqtaldy. Qaratal aýdanyna barǵan jumys sapary barysynda «Úshtóbe – Almaly – Kópbirlik» avtomobıl jolynyń jóndeý júrgizilgen ýchaskelerin júrip ótken oblys ákimi Beıbit Isabaev qurylys jumystarynyń nátıjelerin kórip qaıtty, dep habarlaıdy Egemen.kz Jetisý oblysy ákiminiń baspasóz qyzmetine silteme jasap.
«Úshtóbe – Almaly – Kópbirlik» avtomobıl jolynyń jalpy uzyndyǵy - 176 km, sonyń 137 shaqyrymy jóndeldi, onyń 78,5 shaqyrymyna jóndeý bıyl júrgizildi. Joldyń qalǵan bóligi qanaǵattanarlyq jaǵdaıda.
Atap aıtqanda, Kópbirlikten Almaly aýylyna deıingi uzyndyǵy 28 km jol ýchaskesine 2021 jyly ortasha jóndeý jasaldy. Joldyń qalǵan bóliginiń qurylysy tórt bólikke bólingen.
«О́tken jyly jalpy uzyndyǵy 30 km bolatyn 5 km-den 35 km-ge deıingi ýchaske jóndeldi. Búginde avtotrassanyń 40 shaqyrymyna, ıaǵnı 90-147 shaqyrym ýchaskesine asfalt tóseldi. Qazirgi kezde abattandyrý jumystary júrip jatyr. Atap aıtqanda, jol jıegi nyǵaıtylyp, belgiler ornatylýda. Jumystar 10 qarashaǵa deıin bitedi. Jóndeý jumystary trassanyń ekinshi jáne úshinshi ýchaskelerinde de aıaqtaldy. Bul nysandar paıdalanýǵa berildi. Sóıtip «Úshtóbe – Almaly – Kópbirlik» jolynyń barlyq atalǵan ýchaskelerine asfalt tóseldi. Jobanyń quny 4,9 mlrd. teńgeden asady. Jol 3-shi sanatty, júrý bóliginiń eni 7 metr», dedi Beıbit Isabaevqa jol qurylysy týraly baıandaǵan oblystyq jolaýshy kóligi jáne avtomobıl joldary basqarmasynyń basshysy Ǵalymjan Dáribaev.
Basqarma basshysynyń baıandamasyn tyńdaǵan oblys ákimi jóndeý jumystarynyń sapaly atqarylǵanyn atap ótip, merdiger kompanııa jumysshylaryna isti ýaqytyly aıaqtaǵany úshin rızashylyǵyn jetkizdi.
«Halyqpen kezdesý kezinde turǵyndar Kópbirlik aýylyna baratyn joldyń máselesin kótergen bolatyn. Osyǵan baılanysty joldy jóndeýge qatysty naqty sharalar qabyldadyq. Qazir jol tolyq jóndelip bitti. Bul trassamen júk kólikteri kóp júrmeıtindikten jáne jumys sapaly oryndalǵandyqtan, jol keminde on jyl qyzmet etedi. Kópbirlik – shalǵaıda jatqan aýyl. Aldymen onyń jolytn jasadyq, sosyn aýyz sý sapasyn jaqsarttyq. Bizdiń budan ári de shalǵaıdaǵy jáne shekaralyq aýyldardy damytýǵa baǵyttalǵan naqty josparlarymyz bar», dedi B. Isabaev.
Bul rette turǵyndar da pikir bildirdi:
«О́zim Baıshegir aýylynda turamyn. Otyz jyl kóleminde jolymyz jóndeý kórmedi. Bizdiń de, Kópbirlik aýyly turǵyndarynyń da joldyń sapasyna kóńilimiz toldy. Qazir men sııaqty kólik júrgizýshileri aýdan ortalyǵyna 1 jarym saǵatta jetemiz», deıdi turǵyn Tútintaı Músápirov.
Atap ótsek, kelesi jyly «Úshtóbe – Almaly – Kópbirlik» jolynyń 145-shi ýchaskesindegi Almaly kópiri jańǵyrtylady.
Jalpy jaqsy jáne qanaǵattanarlyq jaǵdaıdaǵy oblystyq mańyzy bar joldardyń úlesi jyldyń sońyna qaraı 94% jetedi.