Pavlodar qalasynyń № 2 soty turǵynjaıǵa zańsyz basyp kirý jáne jábirlenýshiniń dármensiz kúıin paıdalanyp zorlyq kórsetý faktisi boıynsha aıyptalǵan sottalýshyǵa qatysty qylmystyq isti qarady. Sot otyrysy jabyq ótti, zań boıynsha istiń mán-jaıyn jarııa etýge tyıym salyndy, dep habarlaıdy Egemen.kz oblystyq sottyń baspasóz qyzmetine silteme jasap.
Prokýror aıyptalýshy Z.-ǵa alty jyl bas bostandyǵynan aıyrý jazasyn surady. Alaıda jábirlenýshiniń ókili men onyń advokaty moraldyq zııannyń ótelgenin eskere otyryp, Z.-men tatýlasqandaryn jáne oǵan eshqandaı talaptary joq ekenin jetkizdi. Olar sottan bas bostandyǵynan aıyrý jazasyn qoldanbaýdy surady.
Al sottalýshy kinásin moıyndap, áreketine ókinetinin aıtyp, shartty túrde bas bostandyǵynan aıyrý jazasyn taǵaıyndaýdy ótindi.
«Sottalýshynyń qylmysty túngi ýaqytta masań kúıde jáne jábirlenýshiniń erkinen tys úıine zańsyz basyp kirip jasaǵany, sondaı-aq jábirlenýshiniń múgedek ekenin paıdalanyp, dármensiz kúıde bolǵany eskerildi. Osy faktorlardy eskere otyryp, sot Z.-ǵa bes jyl merzimge bas bostandyǵynan aıyrý jazasyn taǵaıyndady. Jaza qylmystyq-atqarý júıesiniń ortasha qaýipsizdik mekemesinde óteledi», delingen habarlamada.
Úkim zańdy kúshine engen joq.