Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary memlekettik organdardyń basshylarymen, «Atameken» UKP, qoǵamdyq uıymdar, kásiporyndar men fermer sharýashylyqtarynyń ókilderimen kezdesti. Onda Qazaqstanda teri men júndi qaıta óńdeý máselelerin talqylady, dep habarlaıdy Egemen.kz.
Komıtet tóraǵasy Álı Bektaev óz sózinde Prezıdent Qasym-Jomart Toqaevtyń 2023 jylǵy qyrkúıektegi Joldaýynda agroónerkásip sektorynyń ónimderin qaıta óńdeý úlesin úsh jyl ishinde 70%-ǵa deıin arttyrý mindeti qoıylǵanyn atap ótti. Alaıda, Úkimettiń qoldaýyna qaramastan, jún men terini qaıta óńdeý deńgeıi tómen kúıinde qalyp keledi.
«Búgingi tańda óndirilgen júnniń jalpy kóleminiń tek 21%-y jáne teriniń 12-13%-y ǵana qaıta óńdeledi. Al jyl saıyn 2 mıllıonnan astam iri qara terisi óńdeýge jiberilmeıdi jáne kóbinese polıgonǵa tastalady. Bul ekonomıka úshin jyl saıyn shamamen 7 mıllıard teńge mólsherinde tikeleı shyǵyndy kórsetedi. Ejelden mal sharýashylyǵy shıkizatyna uqypty qaraıtyn halyq dástúrine mundaı shyǵyn tán emes. Álemdik tájirıbede jún men terini qaıta óńdeý isi agroónerkásip kesheniniń mańyzdy bóligi bolyp otyrsa da, bul sala bizdiń elimizde qosymsha nazar aýdarý men qoldaýdy qajet etedi», dep atap ótti senator Bektaev.
Senatorlar talqylaý kezinde múddeli memlekettik organdarmen birlese otyryp shıkizatty qaıta óńdeý problemalaryn sheshý jónindegi birqatar sharalardy talqylady. Atap aıtqanda, qaıta óńdeý kásiporyndaryn qoldaý úshin qosymsha zańnamalyq sharalardyń qajettigi men salany sýbsıdııalaý máselelerin qaraý týraly aıtyldy. Eki jyl buryn teri men júndi qaıta óńdeý isi Aýyl sharýashylyǵy mınıstrligine berilgen bolatyn. Bul belgili bir sýbsıdııa sharalaryn engizýge múmkindik berdi. Senatorlar salany qoldaýdy zańnamalyq túrde bekitý jáne shıkizatty tereń óńdeýdi yntalandyrý úshin erejeler qarastyrýdy kelesi qadam retinde usyndy.
Kezdesýge qatysýshylar qaıta óńdeý salasynyń damýyn tejeıtin negizgi problemalardy jan-jaqty talqylaý jáne shıkizatty tereńdetip óńdeý úshin kedergilerdi joıý týraly pikir almasý qajettigin atap ótti.