Bıyl jyl basynan beri 97,5 myń azamat, onyń ishinde 47,4 myńǵa jýyq jumyssyz Skills Enbek kásiptik oqytý platformasynda onlaın kýrstan ótken. Osy platformada uzyn-sany 483,9 myń adam bar bolsa, onyń 122,5 myńy bıyl tirkelipti.
Derekterge kóz júgirtsek, oqýdan ótken 47,4 myń jumyssyz azamattyń 14,6 myńǵa jýyǵy negizinen Aqtóbe, Túrkistan, Qaraǵandy, Qyzylorda oblystarynyń, Shymkent qalasynyń jastary. Platforma iske qosylǵannan bastap avtorlar túrli baǵyttarda 616 kýrs ornalastyrsa, onyń 281-i tegin. Kýrstardyń uzaqtyǵy 1-den 72 saǵatqa deıin jalǵasady. Platformada áleýmettik qyzmet kórsetý, IT tehnologııalar, týrızm, basqa da salalardaǵy túrli mamandyqtarǵa qatysty tegin kýrstar sany únemi artyp keledi.
Platforma halyqtyń bilim deńgeıi men kásibıligin arttyrýǵa, mansaptyq damýdy yntalandyrýǵa, «ómir boıy oqytý» tujyrymdamasyn ilgeriletýge baǵyttalǵan. Oqýǵa enbek.kz saıtyndaǵy «Onlaın oqytý» bólimin tańdaý arqyly ótýge múmkindik bar. Platformada bilim alýshy ózine oqytýdyń qolaıly túrin tańdaı alady. Sol sekildi kýrstyń tilin, materıaldy berýdiń yńǵaıly tásilin de derbes tańdaıdy. Bilim alýshy keńeıtilgen kýrstardy izdep, sabaqtyń túsinikti qurylymyn tańdap qana qoımaı, oqý úderisin baqylap, kýrs avtorlarymen baılanysa alady. Oqý aıaqtalǵan soń bilim alýshy 70% shekti deńgeımen test tapsyrýǵa tıis. Onlaın kýrsty sátti aıaqtaǵan jaǵdaıda daǵdylardy ıgergenin rastaıtyn sertıfıkat alady. Bul sertıfıkat Elektrondy eńbek bırjasynda (enbek.kz) tirkelgende jumyssyz azamattyń ózi ázirlegen túıindemede avtomatty túrde kórsetiledi. Jumys berýshiler álgi jumys izdep júrgen azamattyń platformada sátti oqýdan ótip, sertıfıkat alǵanyn kóre alady.
Platformada onlaın kýrstardy ornalastyrý tegin. Ol kýrstardy memlekettik, orys tilderinde jarııalaýǵa bolady. Sonymen qatar platformada erekshe qajettilikteri bar bilim alýshylardyń múmkindigi nazardan tys qalmaǵan. Jalpyǵa aqyly oqýlardyń qunyn aldyn ala esepteýge arnalǵan onlaın-kalkýlıator qarastyrylǵan.