Keshe Qazaqstan Prezıdenti janyndaǵy Ortalyq kommýnıkasııalar qyzmetinde «Qazaqstan joly: Birlik. Patrıotızm. Reformalar» atty halyqaralyq konferensııanyń qorytyndysy boıynsha brıfıng ótti.
Esterińizde bolsa, Parlament Májilisiniń uıymdastyrýymen ótken bul jıynǵa Belarýs, Qyrǵyzstan, Aýǵanstan, Reseı, Tájikstan, Túrikmenstan, parlamentshileri, halyqaralyq uıymdardyń ókilderi qatysyp, Qazaqstan memleketi men onyń basshysy Nursultan Nazarbaevtyń kópetnostyq qoǵamdy damytýdaǵy eńbegin, qazaqstandyqtardyń ulttyq birligi men qoǵamdyq kelisimin qamtamasyz etýge qosqan úlesin talqylaǵan bolatyn.
Brıfıngke Parlament Májilisi Áleýmettik-mádenı damý komıtetiniń múshesi Jumataı Álıev, Parlament Májilisi Halyqaralyq ister, qorǵanys jáne qaýipsizdik komıtetiniń hatshysy Vıktor Rogalev qatysty.
Brıfıng barysynda J.Álıev barlyq ulttardyń Qazaqstandy jaqsy kóretinin, mundaı saıasat eshbir elde joq jáne muny biz parasatty júrgizýimiz kerektigin aıta kelip: «Ulttyq turaqtylyqty kózimizdiń qarashyǵyndaı saqtaýǵa tıispiz. Biz elimizde turyp jatqan barlyq ulttardyń ókilderin qoldaýymyz qajet. Osylaısha, ózimizdiń ulylyǵymyzdy kórsetkenimiz abzal», – dedi.
Onyń aıtýynsha, Qazaqstannyń ultaralyq kelisimge baǵyttalǵan saıasatyna álemniń kóptegen elderi qyzyǵýshylyq tanytyp otyr. Sondaı-aq, ol: «Uly memleketterdiń qataryna kirip kele jatyrmyz. Bizdiń elimizdiń ultaralyq kelisim men tatýlyq modeli eshkimde joq. Bizdiń tájirıbemizdi basqa elder zerttep, alyp jatyr. Bizdiń elde ǵana Prezıdent Assambleıanyń Tóraǵasy bolyp tabylady. Álem kóz tikken bizdiń tájirıbemiz ári qaraı tarala beretinine senimdimin», – dedi.
Al depýtat Vıktor Rogalev Semeı ıadrolyq polıgonyn jabý Qazaqstannyń ǵana emes, adamzat tarıhyndaǵy jarqyn jańǵyryqqa aınalǵandyǵyn erekshe tolqynyspen jetkizdi. «Qazaqstandyq delegasııa músheleri atalǵan aýqymdy basqosýda álemdik qoǵamdastyqqa Prezıdent N.Nazarbaevtyń ıadrolyq qarýsyzdaný jáne taratpaý salasyndaǵy bastamalary týraly aqparattar berdi. Semeı ıadrolyq synaq alańyn jabýdaǵy Qazaqstannyń tarıhı róline de nazar aýdaryldy. Búgingi tańda Qazaqstan jahandyq ıadrolyq qaterdi boldyrmaýdyń qajettiliginde naqty sharalar qabyldaý boıynsha qatań ustanymdy qoldaıdy», – dedi V. Rogalev.
Iá, Qazaqstanda ómir súrip jatqan ózge ult ókilderi úshin bizde barlyq jaǵdaı jasalǵan.
Raýshan TÁÝIRHANQYZY,
jýrnalıst.