Qarjylyq monıtorıng agenttigi jalǵan shetel valıýtasyn ótkizý faktileriniń jıilep ketkeni týraly málimdedi, dep habarlaıdy Egemen.kz.
Vedomstvonyń málimetinshe, Almatyda jalǵan 100 dollarlyq kýpıýralardy satýmen aınalysqan tulǵalar toby anyqtalǵan. Qylmysqa qatysýshylardyń biriniń turǵylyqty jerin tintý barysynda 149 dana (14 900 AQSh dollary) jalǵan dollar tabylǵan.Quqyq buzýshylar ustalyp, sot olarǵa qamaýda ustaý túrindegi bultartpaý sharasyn sanksııalady. Sonymen qatar Batys Qazaqstan oblysynda QMA polısııamen birlesip jalǵan valıýtany ótkizý faktisin anyqtady. Bir top adam Oral qalasyndaǵy lotereıa klýbtarynyń birinde jalǵan 25 000 AQSh dollary men 10 000 evro ótkizgen degen kúdikke ilingen. Anyqtalǵandaı, kúdiktiler bás tigý maqsatynda bul qarajatpen shottaryn tolyqtyrǵan. Jalǵan aqshany satýshyǵa qatysty sottyń sanksııasymen «qamaýda ustaý» túrindegi bultartpaý sharasy tańdaldy.
«Jyl basynan beri Qazaqstan aýmaǵynda aınalymnan 1 060 jalǵan banknot tárkilendi, onyń ishinde ulttyq valıýtada 647 000 teńge somasyna 141 dana, 90 400 AQSh dollaryna 905 kýpıýra, 2 000 eýroǵa 4 kýpıýra, 1 000 ıýan somasyna 10 kýpıýra bar. Alynǵan jalǵan banknottardyń jalpy somasy 43 mln teńgeden asady», delingen habarlamada. Aıta keteıik, bıyl jalǵan kýpıýralardy jasap, ótkizgeni úshin 8 adam 5 jyldan 6 jylǵa deıingi merzimge bas bostandyǵynan aıyrylǵan.