Búgin QR Prezıdenti janyndaǵy strategııalyq zertteýler ınstıtýtyna Vetnam Kommýnıstik partııasy Saıası Bıýrosynyń múshesi, Ho Shı Mın atyndaǵy Ulttyq saıası akademııasynyń prezıdenti, Ortalyq teorııalyq keńes tóraǵasy Ngýen Sýan Thang bastaǵan delegasııa keldi, dep habarlaıdy Egemen.kz.
Qonaqtardy qarsy alǵan QSZI dırektory Erkin Tuqymovtyń aıtýynsha eki eldiń kóptegen uqsastyqtary bar ári sońǵy jyldary saýda-ekonomıkalyq qarym-qatynastar turaqty ósip otyr.
«Qazaqstan men Vetnam arasyndaǵy taýar aınalymynyń kólemi 2023 jyldyń birinshi jartyjyldyǵynda ótken jyldyń sáıkes kezeńimen salystyrǵanda 3,5 esege artyp, 610,9 mıllıon dollarǵa jetti. ASEAN elderi arasynda Vetnam halyq sany jáne satyp alý qabileti múmkindigine qatysty JIО́ boıynsha 3-shi orynda (shamamen $1,5 mlrd). Bul otandyq eksportty keńeıtý perspektıvasyn aıqyndaıdy», dedi E.Tuqymov.
QSZI dırektory sondaı-aq osy jyldyń 25 mamyrynan bastap eki eldiń azamattaryna bir-biriniń aýmaqtarynda 30 kúnge deıin turýǵa múmkindik beretin vızasyz rejım engizilgenin eske saldy.
Ngýen Sýan Thang eki el arasyndaǵy yntymaqtastyqtyń serpindi keńeıýine nazar aýdardy.
«Bizdiń elderimiz arasynda ejelden kele jatqan jaqsy qarym-qatynastar bar, bul – yntymaqtastyqty, onyń ishinde saraptamalyq-taldaý salasyn odan ári damytý úshin zor áleýetke ıe», dedi ol.
Shara sheńberinde Ho Shı Mın Ulttyq saıası akademııasy men Prezıdent janyndaǵy Qazaqstannyń strategııalyq zertteýler ınstıtýty arasynda yntymaqtastyq týraly memorandýmǵa qol qoıyldy.
E.Tuqymov muny mańyzdy qadam dep atap, osy saladaǵy naqty usynystaryn aıtty.
«Biz Chatham House formatyndaǵy naqty máselelerge baǵyttalǵan birqatar onlaın sessııalardy usynyp otyrmyz. Olarǵa tek jetekshiler ǵana emes, sonymen birge zertteýshiler de qatysyp, agroónerkásiptik damý, óńdeýshi ónerkásip, ınvestısııalyq jáne ınfraqurylymdyq yntymaqtastyq múmkindikteri sııaqty ózekti taqyryptardy talqylaı alady», dedi QSZI dırektory.
Sondaı-aq, Vetnam delegasııasynyń sapary sheńberinde eki el arasynda saýda, ekonomıka, ınvestısııa turǵylarynda yntymaqtastyqtyń keleshegi jáne bilim, ǵylym, akademııalyq almasý salalaryndaǵy ózara is-qımyldy tereńdetý máselelerine arnalǵan semınar ótip, oǵan partııa jáne memlekettik organdardyń, ǵylymı uıymdardyń jetekshileri, sondaı-aq eki eldiń ǵylymı qaýymdastyǵynyń ókilderi qatysty.