Almaty qalasynda «Turktime: túrki elderiniń medıa jáne týrızm birligi» ataýymen IV halyqaralyq túrkitildi jýrnalısterdiń medıa forýmy ótti. Keleli keńeske elimizdiń BAQ ókilderimen qatar Ulybrıtanııa, Germanııa, Túrkııa, Ázerbaıjan, Soltústik Kıprden kelgen týrızm jáne medıa salasynyń sarapshylary qatysty. Onda dástúrli jýrnalıstıka men dijital júıe, jasandy ıntellektiniń jańa úrdisteri jáne geosaıası ahýaldyń túrki elderindegi aqparattyq naryqqa áseri talqylandy.
Halyqaralyq forým túrki elderiniń medıa keńistigindegi salalyq jýrnalıstıkanyń sapasyn arttyrýdy kózdeıdi. Kópshilik sanasynda jýrnalıstıka kez kelgen salany qamtı berýge tıis degen jalpy jáne jadaǵaı túsinik bar. Alaıda dúnıe dıdaryna dúrbimen úńilsek, onyń kún ótken saıyn kúrdelenip bara jatqanyn baıqaımyz. Bul úderistiń negizinde biliktiligi joǵary mamandy talap etetin salalar damyp keledi. Jalpylama taqyryppen jumys isteıtin tilshiniń daǵdysy endi azdyq etedi. Sondyqtan dúnıege salalyq jýrnalıstıka kelgeni belgili. Olar mamandanǵan salasyn aýdıtorııaǵa túsinikti tilmen jetkizýge tıis.
Aqparat aıdynyndaǵy osyndaı salanyń biri – ekonomıkalyq jýrnalıstıka. Almatydaǵy medıa forýmnyń basty jańalyǵy – qarjy taqyrybynda halyqty aqparattandyryp júrgen jýrnalıster arasynda ótken «Erkin sóz-2024» shyǵarmashylyq baıqaýy. Baıqaý «Túrkitildes jýrnalıster qory» men «Halyq bank» aksıonerlik qoǵamnyń yjdaǵat-qoldaýymen ótti.
Sonymen medıa-báıge qorytyndysy boıynsha «Úzdik telesıýjet» atalymy KTK arnasynyń tilshisi Ulan Nurahmetke buıyrdy. Al «Saıttaǵy úzdik maqala» atalymyna «atrpress.kz» saıtynyń tilshisi Amandyq Saǵyntaıuly laıyq dep tanyldy. «Basylym betinde jaryq kórgen úzdik maqala» júldesin áriptesimiz, «Egemen Qazaqstan» gazetiniń tilshisi Eligimaı Tóńker jeńip aldy. Jýrnalıst «Jeke tulǵa bankrottyǵy: máseleniń mánisi» taqyrybynda zertteý jasap, alaıaqtyq jolmen nesıe rásimdeıtin krımınaldy naryqtyń kiltıpanyn anyqtap, qarjylyq qaýipsizdik joldaryn aıqyndaǵan.
Forýmnyń qorytyndy bóliminde túrki elderine ortaq medıa platforma jasaqtaý qajettigi talqylanyp, taraptar ózara tıimdi joba ázirleýge ýaǵdalasty.