Memlekettiń basty baılyǵy adam kapıtaly ekenin eskersek, osy baǵytty nyǵaıtyp otyrǵan kópbalaly analarǵa qandaı qamqorlyq jasasaq ta artyq emes. Osy oraıda jergilikti jaýapty oryndardyń kópbalaly analarǵa qatysty kez kelgen máselege baıyppen qaraýdy nazardan tys qaldyrǵany qynjyltady.
Atyraý oblysynda quqyǵy buzylǵan analar sotqa júginip, ádildik izdeýge májbúr boldy. О́ıtkeni olardyń basqa amaly qalmady. Máselen, 36 jasyna deıin ómirge tórt bala ákelgen ananyń biri 2015 jyldan beri «kópbalaly otbasy» sanatyndaǵy baspana kezeginde turǵan. Biraq 2023 jyldyń jeltoqsan aıynda kúıeýiniń úıge menshik quqyǵyn tirkegeni anyqtalǵan. Osyǵan baılanysty jergilikti ákimdik ony turǵyn úıge muqtajdar tiziminen shyǵaryp tastaǵan.
Oblystyq sottyń baspasóz qyzmeti usynǵan aqparatqa súıensek, kópbalaly áıel turǵyn úı-kommýnaldyq sharýashylyq bólimi men turǵyn úı ınspeksııasynyń bul sheshimimen kelispegen. Sóıtip, ádildik izdep, sotqa shaǵym túsirgen.
«Sotta ol bul jer teliminiń kúıeýine ýaqytsha paıdalanýǵa berilgenin túsindirdi. Úı salýǵa qarajaty bolmaǵan otbasy jer telimin senimhat arqyly satyp jibergen. Al satyp alýshy jer telimine 2019 jyly turǵyn úı salyp, keıin ony zańmen resimdegen. Sot talap qoıýshynyń kúıeýiniń jekemenshik quqyǵynda tirkelgen turǵyn úı ǵımaraty bolǵanymen, ol tek úı salynǵan ýchaskeniń ıesi bolyp tabylmaıtynyn anyqtady. «Turǵyn úı qatynastary týraly» zańnyń 73-babynyń 1-tarmaǵynyń 5) tarmaqshasyna sáıkes turǵyn úı alýǵa muqtaj jáne ony alǵanǵa deıin esepte turǵan kópbalaly analar men otbasylar esepten shyǵarýǵa jatpaıdy», dep túsindirdi sottyń baspasóz qyzmeti.
Sot zań talabyn eskerip, kópbalaly áıeldiń talabyn qanaǵattandyrdy. Turǵyn úı-kommýnaldyq sharýashylyq bólimi men turǵyn úı ınspeksııasyna turǵyn úı kezeginde turǵan kópbalaly ananyń kezegin qalpyna keltirýdi mindettedi.
Taǵy bir kópbalaly ana dál osyndaı zańsyzdyqpen betpe-bet keldi. Jeti balasy bar «Altyn alqaly» ana 2016 jyly turǵyn úı kezegine turǵan. Alaıda Maqat aýdanynyń ákimdigi kúıeýiniń atyna tirkelgen úıdi syltaýratyp, kópbalaly anany baspana alý kezeginen syzyp tastaǵan. Kópbalaly ana ákimdiktiń bul uıǵarymymen kelispeı, Atyraý oblystyq mamandandyrylǵan aýdanaralyq ákimshilik sotyna shaǵym túsirdi.
«2016 jyly 7 balanyń anasy turǵyn úı komıssııasynyń sheshimimen «Múgedek balalary bar nemese olardy tárbıelep otyrǵan otbasylar» sanatyna alynyp, memlekettik turǵyn úı qorynan muqtaj azamattarǵa baspana alý kezegine qoıylǵan. Alaıda 2 jyldan keıin turǵyn úı komıssııasy kópbalaly anany Atyraý oblysynyń Maqat aýdanynda kúıeýiniń atyna tirkelgen úıin alǵa tartyp, kezekten shyǵarǵan. Osyǵan baılanysty áıel Atyraý oblystyq mamandandyrylǵan aýdanaralyq sotyna shaǵym túsirdi. Shaǵymda Maqat aýdanynyń ákimine, turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine ózine qatysty hattamalyq sheshimniń bir bóligin zańsyz dep taný, «múgedek balalary bar nemese olardy tárbıelep otyrǵan otbasylar» sanatyndaǵy áleýmettik qorǵalatyn osal toptarǵa jatatyn turǵyn úıge muqtaj retindegi burynǵy kezegin qalpyna keltirýdi mindetteý týraly talabyn qoıdy», dep málimdedi sottyń baspasóz qyzmeti.
Jergilikti sot isti zertteı kele, birneshe jaıtty anyqtady. Birinshiden, talap qoıýshynyń kópbalaly ana ekeni rastalǵan. Ekinshiden, 7 balany ómirge ákelip, tárbıelegeni úshin «Altyn alqamen» marapattalǵan. Úshinshiden, onyń otbasy «múgedek balalary bar nemese olardy tárbıelep otyrǵan otbasylar» sanatyndaǵy halyqtyń áleýmettik osal toptaryna jatatyny anyqtalyp otyr.
«Sot talap qoıýshynyń otbasymen birge turatyn úıi Maqat aýylynan 22 shaqyrym jerde ornalasqandyqtan, múmkindigi shekteýli balany úıde oqytý úshin oblys ortalyǵynan páter jaldaýǵa májbúr bolǵanyn eskerdi. «Turǵyn úı qatynastary týraly» zańnyń 73-baby 1-tarmaǵynyń talaptaryna sáıkes «Altyn alqa» alqasynyń ıegeri memleket esebinen turǵyn úı alǵanǵa deıin esepten shyǵarýǵa jatpaıdy», dedi sottyń baspasóz qyzmeti.
Atyraý oblystyq mamandandyrylǵan aýdanaralyq ákimshilik soty osyǵan baılanysty kópbalaly ananyń talabyn ishinara qanaǵattandyrdy. Ákimdik bóliminiń talap qoıýshyǵa qatysty hattamalyq sheshiminiń bir bóligi zańsyz dep tanylyp, kúshi joıyldy. Bólimge talap qoıýshynyń burynǵy kezegin «múgedek balalary bar nemese olardy tárbıelep otyrǵan otbasylar» sanatyndaǵy halyqtyń áleýmettik osal toptary tizimine engizýdi qalpyna keltirýge mindetteldi.
Al Joǵarǵy sotttyń ákimshilik ister jónindegi sot alqasy jergilikti sottyń qorytyndysymen tolyq kelisti. Sóıtip, jaýapkerlerdiń kassasııalyq shaǵymyn qanaǵattandyrýsyz qaldyrdy.
Atyraý oblysy