Pavlodarda relsti kóliktiń keleshegi zor. Tramvaıdyń ekologııalyq jaǵynan tıimdi ári qaladaǵy kólik ınfraqurylymyn damytýda mańyzdy ról oınaıtynyn eskersek, jergilikti tehnıkalyq parkti jańartý asa ózekti. Oblys bıligi aldaǵy jyldary Eýropa qaıta qurý jáne damý bankiniń kómegimen 25 tramvaı satyp alýdy uıǵaryp otyr.
Memleket basshysy Qasym-Jomart Toqaev óńirimizge jumys saparymen kelgende Pavlodar qalasyndaǵy tramvaı júıesin damytýdy jalǵastyryp, quramdardy jańartýdy jedeldetý qajettigin tapsyrǵan edi.
«Menińshe, Pavlodarda tramvaıdy saqtap qalý qajet. Qajet bolsa, joldardy jańǵyrtyp, jańa, dybyssyz tramvaılar satyp alý kerek shyǵar. Tramvaı – ózinshe tartymdy kólik túri. Eýropanyń kóptegen damyǵan qalasynda tramvaılar kedergisiz júredi. Bul – jergilikti turǵyndar unatatyn ekologııalyq jáne yńǵaıly kólik. Tramvaı júıesin damytýdy jalǵastyryp, quramdardy jańartýdy jedeldetý kerek», degen edi Prezıdent.
Qazir oblys bıligi men Pavlodar tramvaı parki ekologııalyq jaǵynan tıimdi kólikti damytýdyń joldaryn izdestirip jatyr. Eń áýelgi maqsat – parktegi eskirgen vagondardyń ornyna jańalaryn satyp alý. Mekemede 111 tramvaı vagony bar bolsa, kún saıyn 73 birlik tramvaı jelige shyǵady. Al vagondardyń tozý deńgeıi shamamen 73%-dy quraıdy. Shahar rámiziniń birine aınalyp úlgergen relsti kólik ekologııalyq jaǵynan da tıimdi. Aldaǵy ýaqytta qalanyń shetkeri shaǵyn aýdandaryna da avtonomdy tramvaılar júre bastaıdy dep kútilip otyr. Bul úshin Eýropa qaıta qurý jáne damý banki jańa tramvaılar satyp alýǵa 5 mlrd teńge qarajat bóletin boldy. Jańa vagondar avtonomdy, ıaǵnı akkýmýlıator kómegimen júrý múmkindigine ıe. Pavlodar oblysy ákimdigi men Eýropa qaıta qurý jáne damý banki arasynda tramvaı jelisin jańǵyrtý jónindegi jobany qoldaý týraly kelisimshartqa, sondaı-aq «Pavlodar qalasynyń tramvaı basqarmasy» AQ men EQDB arasynda nesıelik kelisimge qol qoıyldy.
«Bank 25 jańa tramvaı satyp alý úshin 5 mlrd teńge qarajat bóledi. Vagondardy jetkizýshilerge qoıylatyn mindetti shart – ekologııa, qaýipsizdik jáne energııa únemdeýdiń úzdik salalyq standarttaryna sáıkes bolýy, sondaı-aq vagondardyń 20 shaqyrymǵa deıin avtonomdy júrý múmkindigin qamtamasyz etý. Bul jolaýshy tasymaly sapasyn edáýir arttyryp, qozǵalys aralyǵyn qysqartýǵa múmkindik beredi», dep habarlady óńirlik ákimdik.
Bir tramvaıdyń quny shamamen 338–447 mln teńge aralyǵynda bolmaq. Jaqyn arada tehnıkalardy satyp alýǵa konkýrs jarııalanyp, onyń qorytyndysynda vagondardy jetkizýshi el anyqtalady. Tehnıkalyq sıpattamalar boıynsha vagonnyń uzyndyǵy – 17 metr, syıymdylyǵy 124 adamǵa shaqtalǵan, al esik sany úsheý bolýy kerek. Pavlodar tramvaı parkindegi tramvaılardyń kóbinde tómen deńgeıli eden qarastyrylmaǵan. Saldarynan múmkindigi shekteýli adamdar men qarııalardyń túsip-minýine qolaısyz. Bul jaǵdaı jańa vagondarda eskeriledi. Sonymen birge pandýspen jabdyqtalǵan esik te bolady.
Jergilikti bılik endigi kezekte shahardaǵy tramvaı joldaryn uzartýdy oılastyryp otyr. «Dostyq» shaǵyn aýdanyna jolaýshylardy jetkizý úshin jańadan satyp alynatyn avtonomdy vagondar baǵyttalady. Joǵaryda aıtqandaı, tramvaılar qýattalǵan akkýmýlıator kómegimen jyljıdy. Elektr baǵandary men symnyń qajeti joq. Mundaı avtonomdy tramvaılardy iske qosý shahardaǵy keleshegi zor jańa jelilerdi ómirsheń etýge múmkindik beredi. Mysal úshin, Ekinshi Pavlodar men Ýsolka shaǵyn aýdandarynda jańa tarmaqtar paıda bolýy ǵajap emes. Eger kózdelip otyrǵan jobadan qarjy únemdelse, jańa tarmaqtar salynady. Ásirese Ekinshi Pavlodar shaǵyn aýdanynda tramvaı júrgizý – kópten beri qozǵalyp kele jatqan másele. Sebebi bul aýmaqtaǵy turǵyndar avtobýs marshrýttarynyń azdyǵyna jáne olardyń mejeli ýaqytynan kóp keshigetinine jıi shaǵymdanady. Ásirese qys mezgilinde problema kóp týyndaıdy. Eger tramvaı tarmaǵy salynsa, jolaýshylardyń júrip-turýy jeńildeı túser edi.
Qazir Nazarbaev dańǵyly, Estaı, Malaısary kósheleri arqyly shaǵyn aýdanǵa jańa relsti jol salý kózdelip te otyr. Jańa tarmaq Rossııskaıa kóshesi arqyly aınalyp, Nurmaǵambetov kóshesine túsedi de, Temirjol vokzalyna keledi. Osylaısha, qalanyń shyǵys aýmaǵynda relsti joldyń tolyq sıkli paıda bolýy múmkin. Jobalaýshylar buǵan balama retinde Gerıng jáne Suraǵanov kóshelerin de usynady. Qala bıligi bul eki jobanyń qaısysy qarjy jaǵynan tıimdi bolady dep oılanyp otyrǵandaı.
Jergilikti ákimdik «Dostyq» shaǵyn aýdanyna jalpy quny 2,7 mlrd teńge turatyn tramvaı jelisin salýdyń jobasyn ázirlep qoıǵan. Ol búginde memlekettik saraptamadan ótip jatyr.
Pavlodar oblysy