Memleket basshysy Aýyl sharýashylyǵy eńbekkerleriniń birinshi forýmynda sóılegen sózinde agrotehnologııasy damyǵan ozyq elderdiń deńgeıine umtylyp, ımportqa táýeldi bolýdy azaıtý kerektigin aıtty, dep habarlaıdy Egemen.kz Aqorda baspasóz qyzmetine silteme jasap.
Prezıdenttiń aıtýynsha bizde mıneraldy tyńaıtqyshtardyń az qoldanylýy otandyq agrosektordaǵy ózekti máselege aınalyp otyr.
«Bıyl egis alqaptaryna burynǵydan eki ese kóp tyńaıtqysh sebildi. Bul – ǵylymı turǵydan qajet tyńaıtqyshtyń 41 paıyzy degen sóz. Jalpy jumys qarqyny jaman emes. Biraq biz agrotehnologııasy damyǵan ozyq elderdiń deńgeıine umtylýymyz qajet. О́zimizde shyǵarylatyn tyńaıtqyshtar aýyl sharýashylyǵyn tolyq qamtamasyz etpeıdi, suranystyń jartysyn ǵana óteıdi. Qazir elimizde quny 4 mıllıard dollar bolatyn aýqymdy ınvestısııalyq jobalar júzege asyrylyp jatyr. Sonyń arqasynda 7 mıllıon tonna mıneraldy tyńaıtqysh óndirilmek. Osylaısha biz ishki naryqty tolyq qamtamasyz etemiz, al artyǵyn eksportqa shyǵarýǵa múmkindik týady. Budan bólek organıkalyq tyńaıtqysh óndirisin damytý mańyzdy. Halyqaralyq tájirıbege qarasaq, qoıdyń júnin sýarmaly jerge tyńaıtqysh retinde tıimdi paıdalanýǵa bolady», dedi Qasym-Jomart Toqaev.
Memleket basshysy agroónerkásip keshenin odan ári sıfrlandyrý men avtomattandyrý máselesi udaıy nazarda bolýǵa tıistigin aıtty.
«Bul baǵytta jaqsy nátıjeler bar. Keıingi bes jylda elimizdegi sıfrly fermerlik sharýashylyqtar sany alty esege jýyq ósip, búginde 200-den asty. Bul – shyn mánindegi bolashaqtyń kásiporyndary. Onda ozyq tehnologııalar jappaı engiziledi. Biraq buǵan toqmeıilsýge bolmaıdy. Atalǵan saladaǵy qyzmetter men prosesterdi tolyǵymen elektrondy formatqa kóshirýdi jedeldetý qajet. Sýbsıdııa alý men jeńildikterdi paıdalaný algorıtmderi fermerler úshin barynsha qarapaıym jáne túsinikti bolýy kerek. Bul týraly aqparattardyń formalary men mazmuny barynsha qoljetimdi bolǵany jón. Jasandy ıntellekt pen «úlken derekterdi» paıdalaný arqyly ǵana óndiristiń barlyq kezeńinde dál esepteý, baqylaý men boljaý múmkin bolmaq. Jalpy jan-jaqty sıfrlandyrý agroónerkásip kesheniniń básekege qabiletin arttyrady, kóleńkeli sektordyń úlesin azaıtýǵa septigin tıgizedi jáne saladaǵy memlekettik basqarýdy odan ári jetildirýdiń mańyzdy faktoryna aınalady», dedi Prezıdent.