О́skemende Gagarın býlvaryndaǵy bes qabatty úıdiń birinshi qabatyndaǵy páterde órt shyqty, dep habarlaıdy Egemen.kz QR TJM baspasóz qyzmetine silteme jasap.
Tótenshe jaǵdaılar qyzmetkerleri órt shyqqan úıden 21 adamdy, onyń ishinde tórt balany qaýipsiz jerge evakýasııalady. Qutqarýshylar arnaıy respıratorlyq kapıýshondardy qoldaný arqyly alty adamdy, sonyń ishinde úsh balany qutqardy.
«О́rt 20 sharshy metr aýmaqty qamtydy. Tótenshe jaǵdaı qyzmetkerleri ony jedel túrde sóndirip, apattyń ári qaraı órshýine jol bermedi. Zardap shekkender tirkelmegen», dep jazylǵan habarlamada.
Qutqarýshylar turǵyndarǵa saqtyq sharalaryn eskertý qajettigin atap ótti.