Eńbek jáne halyqty áleýmettik qorǵaý birinshi vıse-mınıstri Aqmádı Sarbasov Memlekettik eńbek ınspeksııasy komıteti men onyń aýmaqtyq departamentteriniń qyzmetkerleriniń qatysýymen sybaılas jemqorlyqqa qarsy qundylyqtar týraly keńes ótkizdi.
Basqosýda A.Sarbasov sybaılas jemqorlyqtyń aldyn alý, oǵan jol bermeý mınıstrlik jumysynyń negizgi baǵyttarynyń biri sanalatynyn aıtty.
«Sybaılas jemqorlyqqa qarsy is-qımyl týraly zańnama sheńberinde mınıstrlik jyl saıyn qurylymdyq bólimshelerdiń qyzmetindegi sybaılas jemqorlyq táýekelderine ishki taldaý júrgizedi. Bıyl Sybaılas jemqorlyqqa qarsy is-qımyl agenttigimen birge sybaılas jemqorlyq táýekelderine syrtqy taldaý júrgizdik. Memlekettik eńbek ınspeksııa komıtetiniń aýmaqtyq departamentteriniń barlyq qyzmetkeri memlekettik qyzmetkerdiń sybaılas jemqorlyqqa qarsy shekteýleri týraly naqty bilýge tıis», dedi A.Sarbasov.
Memlekettik eńbek ınspeksııasy komıteti tóraǵasynyń mindetin atqarýshy Murat Muratbekov ınspeksııanyń negizgi mindetteri týraly áńgimelep berdi. Onyń ishinde Eńbek zańnamasynyń saqtalýyna memlekettik baqylaýdy, qaýipsiz eńbek jaǵdaılaryn qamtamasyz etý, sondaı-aq jumysshylardyń quqyǵy men bostandyǵyn qorǵaý, jumysshy men jumys berýshiniń ótinishin, aryz-shaǵymdaryn qaraý mindeti jóninde keńinen baıandady.
«Bıyl jyl basynan qarashaǵa deıin eńbek ujymdarynda 4552 tekserý júrgizilip, 7146 buzýshylyq anyqtaldy. Jumys berýshilerge 338,9 mln teńgeden astam somaǵa 3207 ákimshilik aıyppul salyndy. Bıyl sybaılas jemqorlyq qylmys jasaǵany úshin departament basshylary men olardyń tikeleı baǵynysty qyzmetkerlerin jaýapqa tartý faktileri tirkelgen joq. Memlekettik eńbek ınspeksııasy komıtetiniń jemqorlyqty joıý jónindegi negizgi mindetteriniń biri – sybaılas jemqorlyqqa qarsy ımmýnıtet qalyptastyrý, sybaılas jemqorlyq táýekelderin boldyrmaý, jaýapkershiliktiń bultartpastyǵyn qamtamasyz etý jónindegi is-sharalardy jetildirý. 15 oblysta Memlekettik eńbek ınspeksııasynyń qyzmetine qatysty sybaılas jemqorlyq táýekelderine ishki taldaý júrgizildi. Onyń nátıjeleri boıynsha jemqorlyqqa barýǵa yqpal etetin sebepter anyqtaldy. Ár ony boldyrmaý jóninde jumystar júrgizildi», dedi M.Muratbekov.
Kezdesý sońynda A.Sarbasov Memlekettik eńbek ınspeksııasy komıteti men onyń aýmaqtyq bólimsheleriniń basshylyǵyna 2025 jylǵa arnalǵan sybaılas jemqorlyq quqyq buzýshylyqtaryna yqpal etetin sebepter men jaǵdaılardy anyqtaý, joıý jónindegi is-sharalar josparyn ázirlep, bekitýdi tapsyrdy.