«Aq jol» partııasy Fraksııasynyń múshesi Serik Erýbaev Premer-Mınıstrdiń birinshi orynbasary Roman Sklıarǵa júkterdi halyqaralyq tasymaldaýǵa arnalǵan sheteldik ruqsat blankileriniń jasandy tapshylyǵy týraly depýtattyq saýal joldady, dep habarlaıdy Egemen.kz.
Depýtattyń pikirinshe, sheteldik ruqsat blanki – bul tasymaldaýshylarǵa júkterdi shet memleketterdiń aýmaqtary arqyly tasymaldaýǵa múmkindik beretin qatań halyqaralyq esep berý qujaty.
«Qatań eseptilik blankilerin ashyq satý – halyqaralyq sharttar men Qazaqstan Respýblıkasynyń zańnamasyn óreskel buzý bolyp tabylady. Alaıda, mundaı quqyq buzýshylyq úshin qylmystyq jaýapkershilik kózdelmegen. Tek sýbektiniń sanatyna baılanysty 25 – 45 aılyq eseptik kórsetkishti quraıtyn ákimshilik jaýapkershilik. Bul jaýapkershilik 3690 teńgege alynǵan blankini, 1000, 2000 AQSh dollaryna satatyn alypsatar úshin kedergi emes», dedi S.Erýbaev.
Onyń aıtýynsha, alaıaqtar, múmkindiginshe kóp blankilerdi alý úshin, bir kúndik kompanııalar tobyn qurady.
«Jyl basynda, sheteldik blankilerge qoıylǵan barlyq kvotany alyp qoıady, al adal kásipkerler olardan joǵary baǵamen satyp alýǵa májbúr. Saldarynan jyldyń sońynda, paıdalanylmaǵan kvotalar keri qaıtarylyp, al júkter sheteldik tasymaldaýshylardyń enshisine ketedi», deıdi depýtat.
Sondaı-aq depýtat bıylǵy jyldyń shilde aıynda, blankilerdi qaıta satýmen alaıaqtyq jasaýǵa tosqaýyl qoıý retinde erejege ózgerister engizilgenin atap ótti.
Eger buryn, bos blankiler 100 kún merzimge berilgen bolsa, kázirgi ýaqytta ol merzim 30 kúnge qysqartyldy jáne sheteldik blankide zańdy nemese jeke tulǵanyń ataýy kórsetilýi tıis. Alaıda, avtotasymaldaýshylardyń aıtýynsha Halyqqa qyzmet etý ortalyqtary áli de bos blankilerdi berip jatyr.
Depýtat shyn máninde engizilgen ózgerister aıtarlyqtaı áser etpegenin tilge tıek etti.
Serik Erýbaevtyń aıtýynsha Úkimet bul blankilerdi berýdi retteýmen tasymaldaýshylarǵa tártipti saqtaýǵa jáne jergilikti kásipkerler ózderine alynǵan sheteldik ruqsat blankilerin óz kompanııalarynyń maqsatyna saı paıdalanýǵa yqpal etýi tıis.
Depýtat saýalyn qorytyndylaı kele, kelesilerdi usyndy.
«Tıisti baqylaý men ashyqtyqty qamtamasyz etý maqsatynda, barlyq ruqsat blankilerin dereý elektrondyq formatqa kóshirý qajet. Blankilerdiń berilýin jáne paıdalanylýyn baqylaý úshin, biryńǵaı derekter bazasyn qurý maqsatynda, salyq aýdarymdaryn tekserý arqyly Qarjy mınıstrligin sheteldik blankterdi berý júıesimen biriktirilsin. Belgilengen 30 kún merzimde blankilerdi paıdalanbaǵany úshin qatań baqylaý qarastyrylsyn. Zańdy nemese jeke tulǵanyń ataýyn kórsetpeı sheteldik ruqsat blankilerin berýge tyıym salynsyn. Halyqqa qyzmet kórsetý ortalyqtarynyń bos blankilerdi berý faktileri tekserilip, qajet bolǵan jaǵdaıda, tıisti laýazymdy tulǵalar zańnamada kózdelgen jaýapkershilikke tartylsyn», dedi Serik Erýbaev.