Jetisý oblysynyń qylmystyq ister jónindegi mamandandyrylǵan aýdanaralyq soty alqabılerdiń qatysýymen bopsalaý faktisi boıynsha qylmystyq isti qarady, dep habarlaıdy Egemen.kz.
Sottyń málimetinshe, 2024 jyldyń mamyr aıynda aıyptalýshy I. ózi buryn jumys istegen JShS basshysymen kezdesip, seriktestik tarapynan jasalǵan quqyq buzýshylyqtar týraly dálelderi bar ekenin aıtqan. Osy aqparattardy jarııalamaý úshin kúdikti I. zańsyz túrde S.-dan quny 16 mln teńgeden asatyn páterdi óz menshigine berýdi talap etken.
Jábirlenýshi birden polısııaǵa júgingen. 2024 jylǵy 5 maýsymda polısııa qyzmetkerleri jedel-izdestirý sharalaryn júrgizý barysynda kúdikti I-di jeke notarıýs keńsesinde ustaǵan.
«Qylmystyq kodekske sáıkes, aıyptalýshy jasaǵan qylmysy úshin 7 jyldan 15 jylǵa deıingi merzimge bas bostandyǵynan aıyrý jáne múlkin tárkileý túrindegi jaza qarastyrylǵan. Alqabılerdiń sheshimimen I taǵylǵan aıyp boıynsha kináli dep tanyldy, sot jazany jeńildetetin mán jaı retinde sottalýshynyń jas balalarynyń bolýyn eskerip oǵan 8 jyl bas bostandyǵynan aıyrý jazasyn taǵaıyndady», delingen sot habarlamasynda.
Úkim zańdy kúshine engen joq.