Úkimet basshysynyń tapsyrmasymen Oqý-aǵartý mınıstrligi Densaýlyq saqtaý mınıstrligimen birlesip, elimizdegi mektep ashanalarynyń sanıtarlyq-epıdemıologııalyq talapqa sáıkestigine monıtorıng júrgizdi. Sonyń qorytyndysyn Oqý-aǵartý mınıstri Ǵanı Beısembaev baıandady.
Shyndyǵyn aıtqanda, mekteptegi tamaqtandyrýdy uıymdastyrylýyna atqarýshy organdar tarapynan áli de bolsa baqylaý jetkiliksiz bolyp otyr. Sondaı-aq mınıstr muny zańnama talaptarynyń buzylý faktilerinen de anyq ańǵarýǵa bolatynyn aıtty. Monıtorıng toby zań talabynyń buzylýy boıynsha 771 faktini anyqtaǵan. Osynyń bári – respýblıkalyq monıtorıng qorytyndysynda belgili boldy.
Budan bólek, mınıstrlik mektepte tamaqtandyrýdy uıymdastyrý boıynsha keshendi baǵalaý júrgizgen. Oǵan ashanalardyń materıaldyq-tehnıkalyq jabdyqtalýy, bir oqýshyǵa shaqqandaǵy óńirdegi tamaqtaný quny, ata-analar arasynda júrgizilgen saýalnama eskerildi. Sonyń nátıjesinde, Jambyl, Mańǵystaý, Almaty, Atyraý oblysy men Shymkent qalasy ákimdikteri tarapynan mektepterde sapaly tamaqtanýdy uıymdastyrýǵa tıisti deńgeıde kóńil bólinbegeni rastaldy.
«Qazirgi tańda mınıstrlik mektepte tamaqtandyrý qyzmetin satyp alý kezinde ónim berýshilerdi irikteý talaptaryn buzǵany úshin laýazymdy tulǵalarǵa ákimshilik jaýapkershilik engizý máselesin pysyqtap jatyr», deıdi Ǵ.Beısembaev.
Eske salaıyq, buǵan deıin mınıstrlik talaptardy kúsheıtip, bilim berý uıymdarynda tamaqtandyrýdy uıymdastyrýǵa qatysty 7 normatıvtik-quqyqtyq aktini qaıta qaraǵan bolatyn.