Qostanaı oblystyq tarıhı-ólketaný mýzeıinde Naýryzym qoryǵynyń san boıaýǵa malynǵan ásem tabıǵaty beınelengen kórkemsýret kórmesi ashyldy.
Kórme «Plener» dep atalady. Keskindeme ónerinde bul sóz «sýretshiniń tabıǵat aıasynda, ashyq aspan astynda jumys isteýi» degendi bildiredi eken.
Is-sharany uıymdastyrýshylardyń aıtýynsha, tamyz aıynda ótken «Plener – 2024» jobasy aıasynda bir top kásibı sýretshi Naýryzym qoryǵyna arnaıy baryp, birer kún tumsa tabıǵat aıasynda jumys istegen. Atalǵan kórmede osy saparda salynǵan tabıǵat sýretteri kópshilik nazaryna usynyldy. Ekspozısııa zalyna qoıylǵan kórkemsýret týyndylarynda Qostanaı óńiriniń injý-marjany sanalatyn Naýryzym qoryǵynyń orman-dalasy, ózen-sý, qaraǵaı-qaıyńy, qoryqta tirshilik etetin jan-janýarlar men qustar álemi kórinis tapqan.
Jylda qyrkúıek aıy jaqyndaǵanda ótetin dástúrli is-sharaǵa qatysqan qylqalam sheberleriniń biri – Sýretshiler odaǵy oblystyq fılıalynyń tóraǵasy, keskindemeshi Vadım Bykov.
«Bıylǵy plener erekshe este qaldy. Tabıǵat aıasynda óndirtip jumys istedik. Bir qyzyǵy, biz qoryqqa kire salysymen jol boıy túnerip turǵan aspan shaıdaı ashylyp, kún raıy birden jadyrap sala berdi. Biz ketkenshe kún jyly, aýa raıy sýret salýǵa qolaıly boldy. Naýryzym qoryǵynyń ǵajaıyp tabıǵatyn meılinshe jan-jaqty qamtyp, boıaý tilinde sóıletýge tyrystyq», deıdi keskindemeshi.
Qostanaı oblysy