Astanadaǵy Jaqsylyq Úshkempirov atyndaǵy Jekpe-jek saraıynda qoıan-qoltyq urystan álem kýbogi ótti. 15 elden 200-den asa sportshy medaldar jıyntyǵyn bóliske saldy.
Týrnırdiń saltanatty ashylý rásiminde Qorǵanys mınıstri general-polkovnık Rýslan Jaqsylyqov qoıan-qoltyq urystan álem kýbogi Astanada alǵash ret uıymdastyrylǵanyna qaramastan, joǵary deńgeıde ótkenin aıtty. Álem kýbogin Qorǵanys mınıstrliginiń Armııa ortalyq sport klýby, Týrızm jáne sport mınıstrliginiń Sport jáne dene shynyqtyrý isteri komıteti, sondaı-aq elimizdiń qoıan-qoltyq urys qaýymdastyǵy uıymdastyrdy.
Álemdik dodada el úmitin arqalap shyqqan sańlaqtar arasynda qoıan-qoltyq jekpe-jekten, pankratıonnan, MMA jekpe-jeginen halyqaralyq dárejedegi sport sheberi, qoıan-qoltyq urystan Azııa, álem chempıonattarynyń qola, kúmis júldegeri, HIH Azııa oıyndarynyń qola júldegeri Aıan Tursyn, qoıan-qoltyq urystan TMD chempıondary, leıtenanttar Arman Ermenbet, Aıdyn Nurıddınov, serjant Sanat Sadyqov, qoıan-qoltyq urystan halyqaralyq týrnırdiń chempıony, pankratıonnan álem chempıonatynyń júldegeri Abylaı Shákirbekov te sheberligin synady. Qyzdar arasynda Qarýly kúshter qyzmetshileri, MMA-dan álem, Azııa chempıony, qoıan-qoltyq urystan álem chempıony Talshyn Jumataeva, pankratıonnan elimizdiń chempıony Zarına Espolova, segizburysh kásibı lıgasynyń jaýyngeri, qoıan-qoltyq urystan halyqaralyq oıyndardyń chempıony Antonına Kotlıarevskaıa bastaǵan úzdikter aıqasqa shyqty.
Erler 10, áıelder 7 salmaq dárejesinde synǵa tústi. О́zbekstan qurama komandasynyń sapyndaǵy Gııosıddın Djamolıdınov (57 kg), Olımjon Normýrodov (67 kg), Azızhon Abdýllaev (73 kg), Asadbek Hıkmatov (80 kg), Ilıos Kamılov (+97 kg) álem kýboginiń ıegeri atandy. Jerlesterimiz Aıdyn Nurıddınov (62 kg), Bekzat Aqtanov (88 kg), Meırambek Almatov (97 kg) jeńiske jetip, el mereıin asyrdy. Sondaı-aq 73 kg-dan joǵary, absolıýtti salmaqta synǵa túsken sportshymyz Asylbek Smaıylov altyn medal oljalady.
Áıelder arasyndaǵy saıysta da ózbek sportshylarynyń mereıi ústem tústi. Sevara Sadýllaeva (48 kg), Sarvınozhon Oblonazarova (58 kg), Hılola Botırova (64 kg), Nılýfar Polvonova (70 kg), 70 kg-dan joǵary salmaqta Ýmıda Abdýlaeva jeńiske jetti. Senim artqan sportshylarymyzdyń arasynan Emılııa Larıonova (53 kg) men Talshyn Jumataeva (+58 kg) ǵana altyn medal ıelendi.
Halyqaralyq qoıan-qoltyq urys federasııasynyń prezıdenti Sergeı Astahov Álem kýboginiń uıymdastyrylý deńgeıin joǵary baǵalady. Jalpykomandalyq esepte О́zbekstan komandasy kósh bastasa, bizdiń sportshylar 2-satyǵa ornyqty, úshtikti Belarýs eliniń ókilderi túıindedi.