Qaraǵandy oblysynyń dene shynyqtyrý jáne sport basqarmasy basshysynyń mindetterin oryndaýǵa ataqty boksshy, Olımpıada chempıony jáne Vel Barker kýbogynyń ıegeri Serik Sápıev kiristi, dep habarlaıdy Egemen.kz oblys ákimdiginiń baspasóz qyzmetine silteme jasap.
Onyń kandıdatýrasyn QR Týrızm jáne sport mınıstrliginde arnaıy komıssııa keliskennen keıin taǵaıyndaý týraly ókimge aımaq basshysy Ermaǵanbet Bólekpaev qol qoıdy.
Jańa basshyny sport qoǵamdastyǵyna oblys ákiminiń orynbasary Oraz Táýirbekov tanystyrdy.
«Memlekettik qyzmet isteri agenttiginiń jáne týrızm jáne sport mınıstrliginiń kelisimi boıynsha Serik Jumanǵalıuly Sápıev Qaraǵandy oblysynyń dene shynyqtyrý jáne sport basqarmasynyń basshysy bolyp konkýrstan tys taǵaıyndaldy. Onyń praktıkalyq daǵdylary men bilimi onyń jańa laýazymdaǵy áleýetin ashýǵa kómektesedi dep senemiz», dedi Oraz Táýirbekov.
Oblys ákiminiń orynbasary basqarmanyń buryńǵy jetekshisi Temirhan Abylaevqa atqarǵan qyzmeti úshin alǵysyn bildirdi.
Serik Sápıev oǵan senim artqany úshin alǵysyn bildirip, oblysta sportty damytý úshin bar kúsh-jigerin salatynyn aıtty.
«Memleket basshysy aıtqandaı, bıliktiń vertıkaly qurylýy tıis. Alda nazar aýdarýdy qajet etetin sport túrleri eskeriletin jańa zań qabyldanady. Qaraǵandy sportynyń tarıhy zor ári dańqty. Jetekshilik pozısııany qaıtarý kerek. Meniń óz josparlarym, ıdeıalarym bar. Týǵan jerimdi sportqa beıim etkim keledi. Aldymen men barlyq vedomstvolyq baǵynysty uıymdardy tyńdap, olarmen kezdespekshimin, aımaqtardy aralaımyn. Saparlar qorytyndysy boıynsha sheshim qabyldaımyz», dep suhbatynda Serik Sápıev josparlarymen bólisti.
Serik Sápıev birneshe biliktilik boıynsha joǵary bilimi bar: «dene shynyqtyrý pedagogy», «quqyqtaný», «memlekettik jáne jergilikti basqarý», «sport menedjmenti» mamandyǵy boıynsha «Bolashaq» halyqaralyq baǵdarlamasynyń stıpendıaty.
Eńbek jolyn Qazaqstan boks federasııasynda bastady. «Astana Arlans» kásibı sport klýbyn basqardy. 2017 jyly QR Parlamenti Májilisiniń depýtaty bolyp saılandy. 2019 jyldyń qańtarynda memlekettik qyzmetke aýysty – úsh jylǵa jýyq QR Mádenıet jáne sport mınıstrliginiń Sport jáne dene shynyqtyrý isteri komıtetin basqardy. Sodan keıin QR Ulttyq Olımpıada komıteti Bas hatshysynyń orynbasary qyzmetin atqardy. 2022 jyldyń sáýirinen bastap osy taǵaıyndaýǵa deıin «MTEX management» JShS sportty damytý jónindegi basqarýshy dırektory bolyp jumys istedi, QR Ulttyq Olımpıada komıtetiniń vıse-prezıdenti bolyp tabylady.