Qasym-Jomart Toqaev kelesi kóktemde Astanada «Qazaqstan men Reseıdiń máńgilik dostyǵy» alleıasyn ashý jóninde sheshim qabyldaǵanyn aıtty. Bul qala turǵyndary men qonaqtary seıil quratyn kórikti orynǵa aınalady, dep habarlaıdy Egemen.kz Aqorda baspasóz qyzmetine silteme jasap.
Memleket basshysy sonymen qatar Astanada qyrkúıek aıynda ótken V Dúnıejúzilik kóshpendiler oıyndaryna belsendi qatysqany úshin Reseı tarapyna rızashylyǵyn bildirdi. Qazaqstan Prezıdenti 2026 jyly elimizde sporttyń dástúrli túrleri men kıbersportty ushtastyratyn Úshinshi «Bolashaq oıyndary» uıymdastyrylatynyn málimdedi. Bul biregeı saıystyń áýelgi bastamashysy – Reseı.
– Bıyl tamyz aıynda ótken Astananyń Máskeýdegi mádenıet kúnderi kópshiliktiń zor yqylasyna bólengenin atap ótkim keledi. Qazan qalasynda qazaqtyń uly aqyny, oıshyl Abaı Qunanbaıulynyń eskertkish bıýsti ashyldy. Bul – aıtýly oqıǵa. Budan bólek, Máskeýdegi Úlken teatr sahnasynda qazaq ulttyq klassıkasynyń jaýhary – «Abaı» operasy qoıyldy. Taıaý jyldary áıgili Tretıakov galereıasynda jáne Ermıtajda Qazaqstannyń mádenı-tarıhı jádigerlerin pash etetin kórmeler uıymdastyrylady, – dedi Qasym-Jomart Toqaev.