Jarys kúndeligi

Bıylǵy maýsymda eń kóp eıs jasaǵan tennısshilerdiń tizimin Chjen Sınven bas­tap tur. 22 jastaǵy Qytaıdyń ókili 445 ret soqqysyn dittegen jerine dóp túsirgen eken. Ekinshi orynda – Elena Rybakına. Elimizdiń eń úzdik oıynshysy 358 eıs jasady. Odan keıingi satylarǵa belarýstik Arına Sobolenko (307 eıs), reseılik Ekaterına Aleksandrova (284), ıspanııalyq Paýla Badosa (265) jaıǵasty. Mánerlep syrǵanaýshy Mıhaıl Shaıdorov Gran-prı týrnırler serııasynyń fınalyna joldama aldy. «Shynymdy aıtsam, osyndaı dúbirli dodaǵa qatysatyn elimizdiń tuńǵysh sportshysy ekenimdi áli de sezine almaı otyrmyn. Men úshin bul – keremet jańalyq», deıdi jerlesimiz. Atalǵan jarys 5–8 jeltoqsan aralyǵynda Fransııada ótedi. 30 qarasha men 1 jeltoqsanda Alma­tydaǵy «Shymbulaq» taý shańǵysy ký­ror­tynda skı-alpınızmnen el chempıo­na­tynyń jalaýy jelbireıdi. Jarysta Almaty, Aq­mola, Soltústik Qazaqstan, Qaraǵandy, Shy­ǵys Qazaqstan oblystary, Almaty, Shymkent qalalarynyń sportshylary baq synaıdy. Qurlyqtyq hokkeı lıgasynda (QHL) óner kórsetip júrgen Astananyń «Barysy» kezekti týr oıynyn Novosibir qalasynda jergilikti «Sıbır» klýbyna qarsy ótkizdi. Match 2:0 esebimen reseılik komandanyń paıdasyna sheshildi. Halyqaralyq boks qaýymdastyǵy (IBA) taıaý kúnderi Taılandtyń Chıangmaı qalasynda bastalatyn Azııa chempıo­natynyń júlde qoryn jarııalady. Ol 500 000 AQSh dollaryn quraıdy. Naq­tylap aıtsaq, bas júldeni oljalaǵan byl­ǵary qolǵap she­berleri 8 000, kúmispen kúp­telgender 4 000, qolaǵa qol jetkizgender 2 000 dollardan alady. Shırek fınalǵa shyqqandarǵa 1 000 dollar tıesili. Este­rińizge sala keteıik, bul jarysta erler men áıelderdi qosa alǵanda 25 júlde jıyntyǵy sarapqa salynady. Alyptarmen aıqasyp júrgen elimizdiń tanymal kásipqoı boksshysy Ivan Dychko 27 jeltoqsanda Almatyda uıymdastyrylatyn jarysta óner kórsetedi. Osyǵan deıin 14 kezdesýiniń barlyǵyn jeńispen aıaqtap, 13 qarsylasyn esinen tandyrǵan 34 jastaǵy boksshy Vıtalıı Kýdýhovpen kúsh synasady. Reseı boksshysynyń rekordy – 9 kezdesýde 7 jeńis, 3 nokaýt. Bul kúnderi Shvesııanyń Helsıngborg qalasynda ústel tennısinen jastar arasyndaǵy álem birinshiligi ótip jatyr. Sol jarysta baq synaǵan Alan Qur­manǵalıev 1/8 fınalǵa deıin jetti. Bul mejede ol germanııalyq Andre Bertel­smaıerden 1:4 esebimen utyldy.