Jyl basynan qarashaǵa deıin Memlekettik áleýmettik saqtandyrý qorynan jumysynan aıyrylýyna baılanysty áleýmettik tólem alýshylar sany 256,6 myń adamdy quraǵan. Bul rette bıyl 212,9 myń adamǵa tólem alǵash ret taǵaıyndalǵanyn aıta ketken jón. Tólemderdiń jalpy somasy 70,6 mlrd teńgege jetken.
Qoldanystaǵy zańnamaǵa sáıkes jumystan bosatylǵan jumysshylar mindetti áleýmettik saqtandyrý júıesine qatysý ótiline, keıingi 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólem alady. Joǵalǵan kiristiń 45%-yna deıingi mólsherdegi bul qarajat Memlekettik áleýmettik saqtandyrý qorynyń esebinen tólenedi.
Tólem taǵaıyndaýǵa jumystan bosatylǵan jumysshydan ne talap etiledi? Jumysshy aldymen eGov.kz portalyna tirkelýi qajet. Keıin «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaıdy. Izinshe onlaın-qyzmetke tapsyrys berip, barlyq joldy toltyrady. ESQ arqyly qol qoıyp, ótinimdi jiberedi. Araǵa kún salyp, turǵylyqty jerdegi mansap ortalyǵy bos jumys oryndaryn usynady. Eger jumys tabylmasa, 3 jumys kúni ishinde qashyqtan jumyssyz mártebesi beriledi. Qajet bolǵan jaǵdaıda mansap ortalyǵynyń qyzmetkeri qosymsha aqparat jınaý maqsatynda habarlasýy múmkin. Bul qyzmetti onlaın rejimde Elektrondyq eńbek bırjasy (enbek.kz) arqyly da alýǵa bolady.
Jumyssyz retinde tirkelý týraly málimetter jarııalanǵan soń, Eńbek mınıstrliginiń aqparattyq júıesi proaktıvti formatta memlekettik áleýmettik saqtandyrý qorynan tólem taǵaıyndaý jónindegi qyzmet kórsetýge kelisý úshin mobıldi telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.
Memlekettik áleýmettik saqtandyrý qorynyń qarajaty esebinen jumystan aıyrylǵan jaǵdaıda taǵaıyndalatyn áleýmettik tólem jumystan shyǵý sebebine qaramastan tólenedi. Áleýmettik tólem – jumysynan aıyrylyp, qaıta jumys izdeýge kirisken azamattardy qoldaýdyń bir joly.