«Mańǵystaýmunaıgaz» AQ bas dırektory bolyp qytaılyq Ven Szıaszıýn taǵaıyndaldy, dep habarlaıdy Egemen.kz kompanııanyń baspasóz qyzmetine silteme jasap.
«Mańǵystaýmunaıgaz» AQ-nyń joǵary býyn jáne bólimsheler basshylaryn ár úsh jyl saıyn rotasııalaý qarastyrylǵan.
«2024 jyly 2 jeltoqsanda kezektilik negizinde «Mańǵystaýmunaıgaz» AQ dırektorlar keńesiniń sheshimimen Ven Szıaszıýn MMG bas dırektory bolyp taǵaıyndaldy», delingen habarlamada.
Szıaszıýn 1978 jyly 19 qyrkúıekte Qytaıda dúnıege kelgen. Geologııa jáne paıdaly qazbalardy barlaý salasynda tehnıka jáne tehnologııa magıstri dárejesin alyp, I.M. Gýbkın atyndaǵy Reseı memlekettik munaı jáne gaz ýnıversıtetin bitirgen.
Onyń eńbek joly 2005 jyly CNDOC kompanııasynda bastaldy. 2005-2024 jyldar aralyǵynda «SNPS – Aı Dan Munaı» AQ-da jetekshi sýpervaızerden kompanııanyń prezıdenti qyzmetine aýysty. 2024 jyldyń mamyr aıynan jeltoqsan aıyna deıin «Mańǵystaýmunaıgaz» AQ bas dırektorynyń birinshi orynbasary qyzmetin atqardy.
Kompanııa málimetinshe, Bolat Seıitmaǵanbetov «Mańǵystaýmunaıgaz» AQ bas dırektorynyń birinshi orynbasary bolyp taǵaıyndaldy.
Bolat Seıitmaǵanbetov 1971 jyly 12 aqpanda Mańǵystaý oblysynda dúnıege kelgen. Qazaq polıtehnıkalyq ınstıtýtyn jáne Almaty menedjment ýnıversıtetin bitirip, iskerlik basqarý magıstri dárejesin aldy.
Bolat Seıitmaǵanbetov 1993 jyly eńbek jolyn «Qalamqasmunaıgaz» kásipornynda operatorlyq qyzmetten bastap, qyzmette seh pen óndiristik bólimsheniń basshysyna deıin kóterildi. 2022 jyldyń aqpanynan 2024 jyldyń jeltoqsanyna deıin «Mańǵystaýmunaıgaz» AQ «Jetibaımunaıgaz» óndiristik basqarmasynyń bastyǵy qyzmetin atqardy.
Aıta keteıik, buǵan deıin Murat Mustafaev «Mańǵystaýmunaıgazdyń» bas dırektory qyzmetin atqaryp keldi.