Parlament Senatynda Palatanyń Qoǵamdyq Jobalyq keńsesiniń keńeıtilgen otyrysy ótti. Onda Qazaqstanda týrızmdi damytý, tabıǵatty qorǵaý jáne týrıstik oryndarda qajetti ınfraqurylym qalyptastyrý máseleleri talqylandy. Jıynǵa Senat Tóraǵasy Máýlen Áshimbaev, memlekettik organdardyń, saraptama jáne bıznes qaýymdastyq ókilderi qatysty, dep habarlaıdy Egemen.kz Senattyń baspasóz qyzmetine silteme jasap.
Palata Spıkeri otyrysqa qatysýshylarǵa iltıpat bildirip, Memleket basshysy elimizde týrızmdi damytýǵa basa mán berip otyrǵanyn atap ótti. Sondaı-aq atalǵan baǵyt álemdik ekonomıkanyń qarqyndy damýynyń katalızatory jáne ınvestorlar úshin eń tartymdy salalardyń biri ekeni aıtyldy.
Máýlen Áshimbaev Qazaqstanda týrızmge salynyp jatqan ınvestısııanyń artýyna qaramastan, onyń damýyn tejeıtin birqatar júıeli problemalar bar ekenine de nazar aýdardy. Bul rette kólik jáne ınjenerlik ınfraqurylymy nashar, jetý qıyn týrıstik aımaqtarǵa qatysty túıtkilder sóz boldy.
Sonymen qatar Senat Tóraǵasy Palatanyń jobalyq keńsesiniń zańnamalyq qyzmetine jáne barlyq múddeli taraptyń kúsh-jigerin jumyldyrýdy, halyqaralyq tájirıbelerdi zerdeleýdi, sondaı-aq, ozyq tehnologııalardy engizýdi talap etetin mańyzdy mindetterge toqtaldy. Naqty aıtqanda, týrıstik aımaqtarda balamaly energııa kózderin, sýmen jabdyqtaýdy jáne «jasyl» ınfraqurylymnyń basqa da túrlerin paıdalanatyn jobalardy qoldaý úshin zańnamalyq normalar ázirleý barysy sóz boldy.
«Belgili týrıstik el bolý úshin naqty strategııa men memleket, bıznes jáne qoǵam arasyndaǵy belsendi ózara is-qımyl qajet. Sol sebepti, «jasyl» tehnologııalardy qoldana otyryp, týrıstik aımaqtardyń ınjenerlik ınfraqurylymyn jańǵyrtý kerek. Balamaly energııa kózderin qoldaný, sýdy tıimdi paıdalaný, sý tazartý júıelerin engizý, «jasyl» kólik ınfraqurylymyn damytý jáne ekologııalyq týrızm túrlerin jetildirýdiń de mańyzy zor. Osy iste shet elderdiń tájirıbelerin jan-jaqty zerdelegen jón. Bul baǵytta Senat qajetti zańnamalyq ózgerister engizýge qatysty syndarly usynystardy birlesip talqylaýǵa árdaıym daıyn», dedi Máýlen Áshimbaev.
Otyrys barysynda elimizde týrızmdi damytý jáne standartty emes tetikterdi paıdalaný baǵytyndaǵy júıeli sharalar da talqylandy. Sonyń aıasynda Aqmola oblysynyń Aqkól aýdanyndaǵy balamaly ınfraqurylymnyń túrli tásilderi qoldanylǵan jańa kýrorttyq aımaqtardyń jobalary tanystyryldy. Onyń ishinde kún energııasyn paıdalaný, aýa jylý beldeýiniń quraldary, bıotazartý nysandaryn qoldaný, avtonomdy sý kózderi jáne basqa da balamaly túrler bar.
Saraptama jáne bıznes qaýymdastyq ókilderi memleket tarapynan qoldaý paradıgmasyn ózgertý máselesine nazar aýdardy. Olardyń aıtýynsha, memlekettik granttan memlekettik ınvestısııalarǵa ótý jáne ınvestordyń jaýapkershiligin arttyrý asa mańyzdy. Bul tásil osy salada júrgizilip jatqan jańǵyrtýdyń tıimdiligin 10 esege deıin ulǵaıtýǵa qaýqarly.
Is-sharaǵa Senat Tóraǵasymen birge Palata Spıkeriniń orynbasary Jaqyp Asanov, senatorlar, Týrızm jáne sport mınıstri Erbol Myrzabosynov, Aqmola oblysy ákiminiń orynbasary Ernar Jarkeshov, Ulttyq ekonomıka vıse-mınıstri Baýyrjan Qudaıbergenov, Energetıka vıse-mınıstri Qudaıbergen Arymbek jáne taǵy basqalar qatysty.
Aıta keteıik, 13 qyrkúıek kúni senatorlar týrızmdi damytý jáne ınvestor tartý, Aqmola oblysy Aqkól qalasynyń tájirıbesi negizinde týrıstik nysandarǵa ınfraqurylymnyń balamaly kózderin paıdalanýdy memleket tarapynan qoldaýǵa arnalǵan depýtattyq saýal joldady. Sonyń nátıjesinde múddeli memlekettik organdardyń qatysýymen jumys toby quryldy. Onda otandyq kýrorttardy balamaly ınfraqurylymmen qamtamasyz etý jónindegi jobalar qaralyp, zerdelendi.