Senator Janna Asanova óziniń depýtattyq saýalynda qant dıabetimen kúresý úshin aldyn alý jáne emdeý sharalaryn kúsheıtýdiń mańyzdylyǵyn atap ótti, dep habarlaıdy Egemen.kz.
«Búginde Qazaqstanda dertpen aýyratyn 500 myńnan astam naýqas tirkelgen jáne onyń deńgeıi ósip barady. Sonymen qatar, naýqastardyń 50%-ǵa jýyǵy anyqtalmaǵan kúıde qalyp, Ulttyq tirkelimge enbegen. Aýrýdy baqylaýdyń negizgi kórsetkishi – glıkozıldengen gemoglobın deńgeıin monıtorıngteý tek dıspanserlik naýqastardyń 22%-yn ǵana qamtıdy. Bul aýrýdy tıimdi baqylaý úshin jetkiliksiz. Shyǵyndardyń 70%-dan astamy retınopatııa men júrek-qan tamyrlary aýrýlary sııaqty asqynýlardy emdeýge jumsalady. Bul profılaktıkalyq jumystardyń jetkiliksizdigin kórsetedi», dedi J.Asanova.
Senattyń baspasóz qyzmetiniń málim etýinshe depýtat qant dıabetiniń aldyn alý jáne erte anyqtaý, halyqqa arnalǵan aǵartýshylyq baǵdarlamalardy engizý jáne bastapqy medısınalyq-sanıtarlyq kómektiń jumysyn jetildirýdi qamtıtyn keshendi tásil engizýdiń mańyzdylyǵyna toqtaldy. Ol qant dıabetiniń aldyn alý boıynsha Ulttyq baǵdarlama men tıisti ǵylymı ortalyq qurýdyń qajettigin erekshe atap ótti.
«Biz qant dıabetiniń aldyn alý jáne erte anyqtaý jónindegi Ulttyq baǵdarlama ázirleýdi jáne S.Asfendııarov atyndaǵy QazUMÝ bazasynda endokrınologııa jáne metabolızm ǵylymı ortalyǵyn qurýdy usynamyz. Turaqty túrde skrınıngten ótkizý jáne halyqqa arnalǵan aǵartýshylyq baǵdarlamalary aýrýdy asqynýdy azaıtyp, naýqastardyń ómir sapasyn jaqsartýǵa múmkindik beredi», dep túıindedi Senat depýtaty.