Jastardy reprodýktıvti densaýlyq týraly habarmen aqparattandyryp júrgen «Jastar densaýlyǵyn saqtaý – «Saulyq.life» qozǵalysynyń belsendileri jyl boıy atqarǵan jumysyn respýblıkalyq forýmda túıindedi.
«Jastar densaýlyǵyn saqtaý – «Saulyq.life» qozǵalysy byltyr Mádenıet jáne aqparat mınıstrliginiń, Azamattyq bastamalardy qoldaý ortalyǵynyń qoldaýymen qurylǵan. Qozǵalystyń mindeti – jynystyq tárbıe men reprodýktıvti densaýlyq týraly jastardy aqparattandyrýǵa baǵyttalǵan. Aqparattyq quraldardyń kómegin paıdalanyp, jasóspirimder arasyndaǵy júktiliktiń, túsik jasatýdyń, jastar men jynystyq jetilý jasyndaǵy balalar arasynda jynystyq qatynas arqyly juǵatyn aýrýlardyń sanyn azaıtýǵa yqpal etýge bolady.
«Saulyq.life» qozǵalysynyń sarapshylary júrgizgen zertteý nátıjesine úńilsek, el jastarynyń reprodýktıvti densaýlyq máselelerine degen qyzyǵýshylyǵy 2022 jylmen salystyrǵanda 24,7 paıyzǵa artqan. «Jastar densaýlyǵyn saqtaý – «Saulyq.life» qozǵalysynyń jetekshisi Qanat Myrhaıdarovtyń aıtýynsha, jastar osy taqyrypqa qyzyǵýshylyq tanytyp, jiti izdenedi. Buǵan arnaıy anonımdi Telegram botyna keletin suranystar sanynyń artýy dálel. Bir jarym jyl ishinde «Saulyq.life»-tyń psıhologteri men medısına mamandary jastardyń 350-den astam ótinishin qaraǵan.
«Saýalnamanyń negizgi kórsetkishterin «Qazaqstan jastary – 2022» ulttyq baıandamasynda keltirilgen derektermen salystyra kele, osy kezeńde reprodýktıvti densaýlyq taqyrybyna qyzyǵýshylyq tanytqan jastardyń úlesi 44,2%-dan 68,9%-ǵa deıin artqanyn baıqadyq. О́sim, ásirese, aýyl jastary arasynda baıqaldy. Munda kórsetkish 32,2%-dan 48,3%-ǵa deıin artyp otyr. Telegram-bottyń kómegimen el jastary mamandardan tegin keńes alady. Bizge kóbine 15 pen 22 jas aralyǵyndaǵy jasóspirimder men jastar júginedi. Olardy jynystyq densaýlyqqa, basqa máselelerge qatysty alýan taqyryptar qyzyqtyrady», deıdi Q.Myrhaıdarov.
Búginde jobaǵa 2000-nan astam erikti belsendi qatyssa, olardyń barlyǵy kásibı mamandardan arnaıy daıyndyqtan ótipti. Sonymen qatar qoǵam belsendileri ún qosyp, «saulyq.kz» oqytý platformasyn qurǵan. Platformada fızıologııa, etekkir sıkli, erler densaýlyǵy, basqa da mańyzdy taqyryptar týraly aqparattyq beınerolıkter men podkastar únemi jarııalanady. Ondaǵy tanymdyq aqparattardy 2 mıllıonnan adam astam qarap úlgergen.
«Biz eldiń ár óńirinde qozǵalys kóshbasshylaryn daıarlaýǵa arnalǵan oqytý kýrstaryn uıymdastyrdyq. Áleýetti volonterler jynystyq jolmen beriletin ınfeksııalardyń aldyn alýǵa, júktilik pen reprodýktıvti densaýlyqqa teris faktorlardyń áserine qatysty máselelerdi zerttedi. Ár aımaqta eń úzdik nátıje kórsetken 50 qatysýshy qozǵalystyń tálimgeri atandy. Olar endi óz oblysyndaǵy aýyldyq jerlerdiń jastary arasynda túsindirý jumysyn júrgizedi. Jetkinshekter eresekterge qaraǵanda óz qatarlastaryna kóbirek senetindikten, «teńbe-teń» qaǵıdasyn eń tıimdi amal dep bilemiz», dedi Q.Myrhaıdarov sózin túıindep.
Respýblıkalyq forýmda akýsherlik jáne gınekologııa jónindegi dosent, ýrolog-andrologtermen qatar, jastar qozǵalysynyń úılestirýshileri de qozǵalys volonterlerine arnalǵan trenıng uıymdastyrdy. Forýmnyń sońy «Medısına jastary» qoǵamdyq birlestigi uıymdastyrǵan «Medical Youth Ball»-ǵa ulasty. Kesh qonaqtary volonterlerdiń ónerin tamashalady. Úzdik eriktilerdi marapattaý saltanaty ótti.