Jetisý jerinde tolyq sıkldi ónerkásiptik batareıalar shyǵaratyn alǵashqy zaýyt iske qosyldy. Bul – elimizdegi energetıka salasyndaǵy teńdessiz tuńǵysh kásiporyn.
Jetisý oblysynyń irgesi qalanǵaly óńir kóleminde irili-usaqty birneshe kásiporyn ashylǵany belgili. Sonyń ishinde básekege qabiletti ári eksportqa ıkemdi qurylymy úlken jańa zaýyt – «Asma Industrial» JShS. Atalǵan óndiris ornynda ozyq zamanaýı tehnologııalardyń kómegimen óndiriletin batareıalar munaı-gaz, taý-ken ónerkásibinde, telekommýnıkasııada, temirjoldarda, energetıkada taptyrmas qýat kózi sanalady. О́ńir ákimi baspasóz qyzmetiniń málimetinshe, odan bólek jasyl energetıkada, atap aıtqanda, kún, jel elektr stansalarynan alynatyn elektr energııasyn saqtaýda úzdiksiz qýat kózi retinde paıdalanylady. Eń mańyzdysy, ónimniń 40%-y otandyq naryqqa, 60%-y eksportqa baǵyttalǵan. Oblys ákimi Beıbit Isabaev ashylý saltanatynda ónerkásip qyzmetkerlerin quttyqtap, oblys úshin óte mańyzdy oqıǵa ekenin jetkizdi.
«Búgin biz elimizde balamasy joq jańa zaýyt – «Asma Industrial» JShS-ny ashyp otyrmyz. Onyń biregeıligi sol, ártúrli salalarda keńinen qoldanylatyn tolyq sıkldi ónerkásiptik akkýmýlıatorlaryn shyǵarady. Bul ınvestısııalyq jobanyń iske asyrylýy oblysymyz úshin óte mańyzdy oqıǵa dep esepteımin. Biz óz tarapymyzdan barynsha qoldaý kórsettik. Jergilikti bıýdjet qarajaty esebinen 260 mln teńge somasyna ınjenerlik jeliler tartyldy. Kompanııa óz salasyndaǵy ınnovasııalyq kóshbasshy retinde mártebesin nyǵaıtyp, Memleket basshysy qoıyp otyrǵan óndiristik saıasatty alǵa bastyrý mindetin iske asyrý jolynda joǵary nátıjelerge qol jetkizedi dep úmittenemiz», dedi B.Isabaev.
Mundaǵy stasıonarlyq batareıalar 20 jylǵa deıin qyzmet kórsetedi. Starterlik akkýmýlıatordan aıyrmashylyǵy qozǵalyssyz bir orynda turady ári qyzmet kórsetý ýaqyty áldeqaıda joǵary. Zaýyt dırektory Serikbaı Ajmaǵambetovtiń aıtýynsha, jobanyń quny – 8,5 mlrd teńge. Zaýyt jylyna 210 myń dana ónim shyǵarýǵa qaýqarly. О́ndiris tolyq qýatyna shyqqanda, jumys oryndarynyń sany 180-nen asyp, jergilikti turǵyndar turaqty jumyspen qamtamasyz etiledi. Bul rette zaýyt óniminiń bir bóligi eksportqa jóneltilip, bir bóligi jergilikti naryqqa shyǵarylady.
«Osy jobany 2021 jyldan qolǵa ala bastadyq. Sodan beri bizge qoldaý kórsetip kele jatqan azamattardyń bárine alǵysymdy bildiremin. Bizdiń ujymymyz jas, endi qalyptasý ústinde, qajetti kadrlardy qabyldaý jumystary júrip jatyr. Mamandarymyzdyń kópshiliginiń osy salada birneshe jyldyq tájirıbesi bar. Al jas mamandardy úderis barysynda oqytyp, úıretetin bolamyz. О́nimderimizge suranys bar, bul rette irgeli kompanııalarmen kelisimder jasalýda», deıdi S.Ajmaǵambetov.
Jańa zaýytqa jumysqa turǵandardyń arasynda taldyqorǵandyq Dastan Qanatqanov ta bar. Ol qazir qorǵasyn plastınkalaryn quıý sehynyń bastyǵy qyzmetinde.
«О́ndiris salasynda jumys istep júrgenime 10 jyldaı boldy. Elimizde mundaı zaýyt bireý-aq, sondyqtan osy biregeı kásiporynda jumys istep, kásibı damýymdy jalǵastyrý men úshin óte mańyzdy. Bizdiń zaýytta Koreıa tehnologııasy qoldanylady, bul shyǵaratyn batareıalar asa kúrdeli salalarda – taý-ken, temirjol, telekommýnıkasııa salalarynda qoldanylady. Kez kelgen óńirdiń qýatty irgetasy – ondaǵy iri óndiris oryndary. Iаǵnı salyq túsimi molaıyp, sol arqyly aımaqta ınfraqurylym jaqsarady, jol, sý, jaryq, gaz sııaqty halyqqa kerekti jaǵdaılar jasalady. Sondyqtan bul jańa zaýyttyń oblystyń damýyna qosatyn úlesi mol bolady dep senemin», dedi zaýyt qyzmetkeri.
Jalpy, Jetisý oblysynyń ónerkásip óndirisinde 549 kásiporyn jumys isteıdi. Onyń 14-i iri, 13-i orta kásiporyn, onda 30 myńnan astam adam jumyspen qamtylǵan. 2024 jyldyń 10 aıynda 3,9% ósimmen 278,8 mlrd teńge ónerkásiptik ónim óndirildi.
Jetisý oblysy