Bıyl el gazeti «Egemen Qazaqstannyń» jaryq kórgenine 105 jyl tolady. Keshegi «Ushqynnan» búginge jetken basylym qaı ýaqytta da ultqa qyzmet etýden aınyǵan joq. Osydan 5 jyl buryn basylymda bizdiń Sekseýil kentinde júzdegen balanyń kúndelikti temirjol aýmaǵynan ótip, ortalyqtaǵy mektepke baryp júrgeni týraly jazylǵan maqaladan keıin Memleket basshysynyń tapsyrmasymen jańa bilim oshaǵy boı kóterip, osydan úsh jyl buryn qoldanysqa berildi.
Jalpy, keıingi jyldary iri toraptyq stansa qataryndaǵy Sekseýil kentine qonystanýshylar qatary kóp. Jyl saıyn túrli nysandar ashylyp, kásip bastaǵandar da kóbeıip keledi. Osyǵan kóńil toǵaıtqanymyzben mundaǵy mektep máselesi kóbimizdi kúmiljite beretin. Keıingi 20-30 jylda paıda bolǵan jańa aýdandaǵy mektep máselesi biraz jyldan beri dúrkin-dúrkin kóterilip, salalyq mınıstrlikke san márte joldanǵanymen sheshilmeı kelgenin de biletin edik. Kúndelikti 14 relsti kesip ótip, ortalyqtaǵy bilim oshaǵyna qatynap júrgen 360 balanyń jaıyn oılaǵan jurt úmiti úzile bastaǵanda 2019 jyldyń 10 jeltoqsanynda «Egemen Qazaqstan» gazetinde basylymnyń oblystaǵy menshikti tilshisi Murat Jetpisbaıdyń «Temirjoldy jaǵalap top bala júr» degen maqalasy shyǵa qaldy. Ertesi «osy maqalaǵa Memleket basshysy nazar aýdaryp, Úkimetke tapsyrma beripti» degen habardy estip, bir-birinen súıinshi suraǵandar kóbeıdi.
Osylaısha, kenttegi jańa aýdannan oryn tepken №283 orta mektep 2021 jyldyń 1 qyrkúıeginde esigin aıqara ashyp, alǵashqy shákirtterin qabyldady. Eki aýysymda 442 bala bilim alatyn mektepte 20 synyp kesheni, sport, májilis zaldary, kitaphana men ashanany aralap kórgen jurttyń sol sáttegi qýanyshyn sózben jetkizý qıyn edi.
Osy kúni 300 oryndyq bilim oshaǵynda 69 muǵalim men 37 kishi qyzmetker jumys istep, 440 bala oqyp jatyr. Úsh jyl ishinde ustazdar men oqýshylar kóptegen jetistikke jetti. Bıylǵy oqý jylynda jalpy bilim beretin pánder respýblıkalyq olımpıadasynyń aýdandyq kezeńinen mekteptiń 9-11-synyp oqýshylary quqyq negizderi páninen júldeli 1-oryn ıelenip, oblysqa joldama aldy. Tarıh, bıologııa, aǵylshyn tili men geografııa pánderinen de júldeli orynnan kórindi.
Jańa mektep oqýshylary 2021-2022 oqý jylynda úsh úzdik, bir erekshe attestat ıelense, kelesi jyldy eki «Altyn belgi», bir úzdik, tórt erekshe attestatpen túıindepti. Byltyrǵy oqý jyly qorytyndysy bir «Altyn belgi», eki erekshe attestat bolyp otyr. Osy oqý jylynda mektepte tórt «Altyn belgi», bir «Úzdik attestat» jáne tórt erekshe attestattan úmitkerler bar eken.
Mektep shákirtteri túrli ǵylymı jobalar men sporttan da alda keledi. Bilim ordasyndaǵy ustazdar muǵalimder lıgasy jarysynda voleıboldan 2-oryn ıelendi. «Ulttyq mektep lıgasy» jobasyna qatysqan 7-8-synyp oqýshylary birinshi oryn bıiginen kórindi. Mektep oqýshylary arasynda ótkizilgen dástúrli aýdandyq spartakıadada fýtzaldan 8-9-synyptar oqýshylarynan jasaqtalǵan qyzdar komandasy ekinshi oryn tuǵyryna kóterildi.
Jańa úlgide salynǵan eki qabatty mektep aýlasynda jasyl jelek jaıqalyp, aınalasy baqshaǵa aınalǵan. «Jasyl jelek» jobasymen jumys isteıtin mektep aýlasynda ósken jemister men baqsha ónimderi múmkindigi shekteýli otbasylaryna taratylyp beriledi.
Jurtshylyq arasynda «Egemen» saldyrǵan mektep» atalyp ketken bilim oshaǵynyń búgingisi osyndaı.
Táýekel JUMAǴAZIEV,
zeınetker
Qyzylorda oblysy,
Aral aýdany,
Sekseýil kenti