Taılandtyń Chıangmaı qalasynda ótip jatqan Azııa chempıonatynyń áıelder arasyndaǵy fınaldyq kezdesýleri ótti. Bul birinshiliktiń bir ereksheligi – áıelder alǵash ret dýlyǵasyz judyryqtasty. Bes birdeı boksshymyz fınalǵa shyǵyp, altyn medal úshin baq synady. Nátıjesinde, beseýi de jeńiske jetti. Sóıtip, boksshy qyzdarymyz dúbirli dodadan 5 altyn, 5 qola medal oljalap, jalpy komandalyq esepte kósh bastady.
Qorjynymyzǵa alǵashqy altyndy 60 salmaqta Qytaı boksshysy Gııandj Lıge qarsy saıysqa túsken Vıktorııa Grafeeva saldy. Qaptaldaǵy bes tóreshi de jerlesimizdiń ústem túskenine shek keltirgen joq. Eresekter dýyna jańa qosylǵanyna qaramastan qaısar minez tanytqan boksshy jankúıerlerine rızashylyǵyn jetkizdi.
«Men úshin bul doda asqar asý, úlken syn ispetti. Eresekter sapyna qosylǵanyma kóp bola qoıǵan joq. Únemi qoldaý kórsetken jankúıerlerge, Boks federasııasynyń basshylyǵyna, ulttyq quramanyń bas bapkeri bastaǵan ujymǵa alǵysymdy aıtamyn. О́zime artylǵan senimdi zor jaýapkershilik dep qabyldadym, elimizdiń kók týyn árqashanda jelbiretkim keledi», dedi V.Grafeeva.
Enshimizge buıyrǵan ekinshi altyn medaldy Aıda Ábikeeva ıelendi. 63 kg salmaq dárejesinde Vetnam eliniń ókili Lın Ha Aıdanyń aıbynyna tótep bere almady. Parıj jazǵy Olımpıadasynyń dýyn kórgen tájirıbeli Ha úzdiksiz shabýyldaımyn dep júrip mańdaıyn tasqa soqty. Jerlesimiz ózinen tájirıbeli qarsylasynyń ekpininen yqqan joq, kerisinshe shabýylyn soqqymen toıtaryp, sátti qorǵana bildi. Aıqastan keıin pikir bildirgen Aıda vetnamdyq boksshynyń fızıkalyq daıyndyǵy álsiz bolǵanyn atap ótti.
70 kg salmaq dárejesinde Natalıa Bogdanova jergilikti sportshy Baıson Manıkonnan basym túsip, Azııa chempıony atandy. «Zal toly jankúıerlerdiń keshendi jańǵyrtqan qıqýy bapkerlerdiń nusqaýyn kómip ketip jatty. Degenmen esh abyrjymadym, aıqas aldynda qurǵan taktıkalyq jospardy múltiksiz oryndap shyqtym. 2-raýndta ekinshi tynysym ashylǵandaı kúı keshtim. Elimizdiń ánuranyn shyrqatyp, kók týymyzdy jelbiretetinime senimdi boldym, úmitim aqtaldy», dedi N.Bogdanova.
81 kg salmaqtyń fınaldyq jekpe-jeginde Gúlsaıa Erjan ýkraınalyq Karıne Aırapetıandy aıqyn jeńdi. Tartystan keıin jerlesimiz aıqasty merziminen buryn aıaqtap, qarsylasyn sulatyp túsirýdi kózdegenin aıtty. «Aırapetıan anaý aıtqandaı tegeýrindi boksshy emes, dese de qobaljydym. О́ıtkeni qalyń jankúıerdiń maǵan zor senim artqanyn, altyn medal oljalaıtynyma shúbásiz sengenin tereń sezindim», dedi G.Erjan.
Eldana Tálipova (81 kg salmaqtan joǵary) úshin de Azııa chempıonaty sátti aıaqtaldy. Fınaldyq tartysta ózbekstandyq Oltınoı Sotımboevadan basym tústi.
Jartylaı fınalda súringen Áıgerim Sáttibaeva (48 kg), Jazıra Oraqbaeva (52 kg), Uljan Sársenbek (57 kg), Mılana Safronova (66 kg), Dıana Maǵaýııaeva (75 kg) qola júldeger atandy.
Áıelder quramasynyń bas bapkeri laýazymyna bıyl sáýir aıynda taǵaıyndalǵan Eldos Saıdalın bastaǵan ujymnyń eńbegi aqtaldy. Eresekter quramasyna basshylyq etýdiń jaýapkershiligi de joǵary. О́zine júktelgen mindetti, artylǵan senimge selkeý túsirmedi. «Qyzdardyń qarymy qanshalyqty ekenin Taıland koroldiginiń tórine qurylǵan rıng aıqyndaıdy» dep edi bas bapker elden attanarda. Shákirtteri úmitti aqtaıdy. Burymdy boksshylarymyz Azııa chempıonatynan 5 altyn, 5 qola medal enshilep, qurlyq alamanynyń úzdigi atandy. Erler arasyndaǵy fınaldyq aıqas búgin ótedi. Toǵyz oǵlannan da orasan olja kútemiz.