Ulttyq statıstıka bıýrosynyń 2024 jyldyń 1 qarashasyna deıingi málimetine sáıkes, búginde elimizde 20 mıllıon 243 myńnan astam adam turyp jatyr. Onyń ishinde qala halqy – 12 727 404 adam, aýyldarda 7 516 577 turǵyn bar.
Almaty qalasynda – 2 280 296, Astanada – 1 511 807, Shymkentte 1 249 581 adam turyp jatyr. Jyl basynan beri halyq sany 190 myńǵa artty. Elimizde áıelderdiń úlesi basym – 10 342 959, er adamdar – 9 880 259. Toǵyz aıda bala týý kórsetkishi de táýir, 278,7 myń náreste ómirge kelgen. О́lim-jitim de tómendemeı tur – 99,5 myń adam.
Almaty qalasynyń turǵyndary on bir aıda 51 621 adamǵa artqan. Onyń ishinde tabıǵı ósim – 18 824, kóshi-qon esebinen 32 797 adam shahar turǵyny atanǵan. Túrkistan oblysynyń halqy da kóbeıip keledi. On bir aıdyń ishinde oblys halqynyń sany 2 142 171 adamnan 2 154 461 adamǵa jetken. Degenmen bul óńirde tabıǵı ósim joǵary bolǵanymen, kóship ketýshilerdiń de qatary qalyń. Almaty oblysynda búginde 1 554 695 turǵyn bar. Elorda halqynyń ósý dınamıkasy da jaqsy. Qańtar aıynda Astanada 1 430 105 adam tursa, 1 qarashadaǵy kórsetkish – 1 511 807. 11 aıda bas qalanyń turǵyn sany 81 702 adamǵa kóbeıdi. Úshinshi megapolıs Shymkent qalasynyń halqy da 11 aıdyń ishinde 27 515 adamǵa artqan. Mıllıonnan astam halqy bar Jambyl oblysynda qańtar aıynda 1 222 593 turǵyn bolsa, 1 qarashadaǵy derekte 1 222 835 adamǵa jetken. Qaraǵandy oblysynda kerisinshe halyq sany kemigen. Qańtar aıynda oblysta 1 135 351 turǵyn bolsa, 1 qarashadaǵy derekte óńir halqynyń sany – 1 134 132 adam.
Statıstıkalyq málimet boıynsha, 11 aıda 22 955 adam elimizge kóship kelse, 11 259 adam elimizden qonys aýdaryp, kóshi-qon saldosy 11 696 adamǵa jetken. Byltyrǵy kórsetkishpen salystyrǵanda elimizge kóship kelýshilerdiń qatary artqan, kóship ketkenderdiń sany az.
О́lim-jitim Soltústik Qazaqstan (11,52 myń), Shyǵys Qazaqstan (11,32 myń), Qostanaı oblystarynda (10,12 myń adam) joǵary. Sarapshylar muny bul aımaqtarda jasy ulǵaıǵan turǵyndardyń basymdyǵymen baılanystyrady.