Kórnekti ǵalym, memleket jáne qoǵam qaıratkeri akademık Qanysh Sátbaevtyń 125 jyldyǵyna oraı Prezıdent janyndaǵy Ulttyq ǵylym akademııasy Almatyda Dostyq úıinde ǵylymdy damytý máselelerine arnalǵan dóńgelek ústel ótkizdi.
Dóńgelek ústel jumysyna Ulttyq ǵylym akademııasynyń basshylyǵynda bolǵan ǵalymdar, derbes ǵylym akademııalarynyń basshylary jáne ǵalymdar qatysty.
El ekonomıkasynyń damýyna, qoǵamdaǵy mańyzdy máselelerdi sheshýge ǵalymdardy jumyldyra otyryp, UǴA aldaǵy basymdyqtaryn anyqtap, qazirgi kezde ǵylymı jáne taldamalyq zertteýlerdi iske asyryp keledi.
Bastaýynda akademık Qanysh Sátbaev turǵan UǴA jańa tehnologııalar, ınnovasııalyq múmkindiktermen ushtastyra otyryp tyń jobalardy qolǵa aldy. Qazirgi kezde pikirtalas alańdarynda keleli máselelerdi talqylap, sheshý joldaryn qarastyryp jatyr.
Alqaly jıynda Prezıdent janyndaǵy Ulttyq ǵylym akademııasynyń prezıdenti, akademık Aqylbek Kúrishbaev aýqymdy baıandama jasap, ǵylymnyń damýy men ǵylymı yqpaldastyq, jas ǵalymdardy úılestirý salasyndaǵy mańyzdy isterge toqtalyp, atqarylǵan jumystarmen tanystyrdy.
«Qazirgi kezde Memleket basshysynyń tapsyrmasyna sáıkes, álemdegi 20 jetekshi akademııa tájirıbesin taldaı otyryp, óz baǵdary men aldaǵy 10 jylda damý strategııasyn naqty ındıkatorlarmen aıqyndaǵan UǴA halyqaralyq tájirıbe negizinde akademııa jumysynyń naqtyly modelin jasady. Qolda bar resýrstardy qoldanyp, tıimdiligin arttyra otyryp, qorytyndysynda qandaı nátıjelerge qol jetkizýge bolatynyn zerttep, shetel akademııalarynyń tájirıbesine nazar aýdaryp otyr. Akademııa ǵylym salasyndaǵy oryn alǵan barlyq olqylyqtardy anyqtap, ǵylymnyń basymdyqtaryna kóńil bólip keledi», dep atap ótti A.Kúrishbaev.
Baıandama barysynda UǴA basshysy sonymen qatar alǵash ret ǵylymdy damytýǵa negizdelgen forsaıt-zertteýler, otandyq ǵylymnyń naqty jaı-kúıin baǵalaıtyn taldaý ortalyǵynyń jumys nátıjeleri týraly aıtyp ótti. 2025-2027 jyldarǵa arnalǵan ǵylymı-tehnıkalyq tapsyrys barysyna saraptama jasaldy. Mınıstrlikterge salalyq ǵylymdy damytý boıynsha naqty keńester berilip, túıtkildi máseleleri boıynsha akademııa prezıdıýmy kóshpeli otyrystar ótkizdi. Mundaǵy maqsat aımaqtar boıynsha jergilikti bılik tarapynan da ǵylymdy qoldaý isinde jarqyn bastamalardyń bolǵany mańyzdy. Osy jumystardyń nátıjesinde analıtıkalyq jazbalar, jol kartasy daıyndaldy.
Bıyl táýelsizdik jyldarynda alǵash ret akademııa janynan Jas ǵalymdar keńesi qurylǵany belgili. Qazir keńes quramynda 20-dan astam jetekshi jas ǵalym bar. Keńes quramyndaǵy ombýdsmen jas ǵalymdardyń máselelerine usynystar berip otyratyn bolady.
Jıynda elimizge belgili ǵalymdar Serikbek Dáýkeev, Ábdirasyl Jarmenov, Kárimbek Qurmanálıev, Asqarbek Qusaıynov, Baqytjan Jumaǵulov, Rahman Alshanov, Vıacheslav Lokshın, Nurlan Ryspanov, taǵy da basqa ǵalymdar akademııa prezıdentiniń baıandamasyna qatysty oılaryn bildirip, akademııa mindetterine qatysty jan-jaqty pikir bildirdi. Jas ǵalymdardy qoldaý, olarǵa áleýmettik jaǵdaı jasaý, zerthanalardy zamanaýı jabdyqtaý, orta bilimniń sapasyn arttyrý sııaqty bir-birinen bóle jaryp qaraýǵa bolmaıtyn keleli máselelerdi aǵa ǵalymdar naqty dálelder keltire otyryp alǵa tartty. Bul baǵytta halyqaralyq birlesken jobalardyń da mańyzyna ıek artqan abzal.
Búginde Qytaı, Amerıka, Túrkııa, Reseı, TMD elderiniń jetekshi ǵylym akademııalarymen yntymaqtastyq týraly kelisimderge qol qoıǵan UǴA-da Germanııa, Ońtústik Koreıa, Qytaımen birlesken 3 halyqaralyq ortalyq quryldy. Jetekshi 8 akademııanyń tájirıbesi negizinde ǵylymı etıka kodeksi – ǵylymı zertteýlerdi júrgizý standarty daıyndaldy. Falsıfıkasııany, plagıatty, múddeler qaqtyǵysyn jáne jalǵan birlesken avtorlyqty anyqtaýdyń qaǵıdattary bekitildi.
Endigi kezekte ǵylymı birlestikter Ulttyq ǵylym akademııasymen birlestikte jumys isteýge daıar. Jas ǵalymdarǵa keńes berip, olardy ǵylym kóshinen qalmaýda qoldaý kórsetetin bolady. Ǵalymdar ǵylymı tehnologııalyq damýda qol qoıylǵan memorandýmdarǵa sáıkes jol kartasy aıasynda jumystardy jalǵastyratyn bolady.
ALMATY