Jańaózen qalasynyń búgingi áleýmettik-ekonomıkalyq kelbeti, qaladaǵy qordalanǵan máseleler men olardy sheshý joldary óńir basshysy Nurdáýlet Qılybaıdyń munaıly qaladaǵy turǵyndarmen eseptik kezdesýinde tilge tıek boldy. Ákim qala turǵyndarymen kezdesip, jergilikti halyqtyń usynys-pikirlerin tyńdady.
Aldymen qala ákimi Janseıit Qaınarbaev Jańaózenniń 2024 jyldyń qańtar-qazan aılaryndaǵy áleýmettik-ekonomıkalyq damý kórsetkishteri, 2025 jylǵa arnalǵan negizgi josparlary týraly baıandama jasady.
J.Qaınarbaevtyń aıtýynsha, qalada 2024–2026 jyldar aralyǵynda jalpy quny 174 mlrd teńgeden asatyn 13 jańa iri ınvestısııalyq jobalardy júzege asyrý josparlanǵan, ol jobalar júzege asqanda myńnan astam jańa jumys oryny ashylatyn bolady.
Josparlanǵan jobalar qatarynda beton shyǵarý zaýyty, Jańa gaz óńdeý zaýyty, sondaı-aq «QazMunaıGaz» UK» AQ men «Eni S.p.A.» kompanııasynyń birlesken gıbrıdti elektr stansasy, sondaı-aq 2025 jyly «KazPetroDrilling» AQ-nyń sorǵy-kompressorlyq qubyrlar men sorǵy shtangalaryn óndiretin zaýyty, shaǵyn qus fermasy jobasyn júzege asyrý josparlanyp otyr. Qazir atalǵan jobalar jumysy tııanaqty júrgizilip jatyr. 2025 jyly sáýir aıynda ashylady dep josparlanǵan sorǵy-kompressorlyq qubyrlar men sorǵy shtangalaryn óndiretin zaýyt qurylysy qarqyndy. Negizgi seh qurylysynyń, ashana men jataqhana qurylystarynyń irgetastary qalanyp, qabyrǵalary kóterilip, montajdaý jumystary men ózge de ishki jumystary júrip jatyr. Negizgi sehtyń beton tósenishin jasaý jumystary qolǵa alynyp, modýldi ǵımarattyń qurylysy 95%-ǵa, modýldik ǵımarattyń ishki ınjenerlik kommýnıkasııalyq montaj jumystary men negizgi sehtyń temir konstrýksııalaryn montajdaý 70%-ǵa oryndalǵan. Sondaı-aq negizgi sehtyń qubyrlar, sýmen qamtamasyz etý jabdyqtary jumysy da 30% shamasynda eńserilgen eken. Mejelengen ýaqyttan kesh qalyp jatqan tustar da joq emes, biraq jumysty sáýir aıyna deıin aıaqtaý basty nazarda.
Jolaýshylar tasymaly salasynda bıyl qala aýmaǵynda 5 qosymsha baǵyt ashylyp, qazirgi ýaqytta 10 marshrýt boıynsha 33 avtobýs qyzmet kórsetip keledi. Sondaı-aq Kendirli týrıstik aımaǵyn damytý aıasynda kıeli oryndarǵa jańa baǵyttar ashý, ıaǵnı «Kendirli – Temir Baba qorymy – Qaýyndy», «Qorǵanbaı oıpattary – Kendirli-Qaıasan – Adamtas – Aqsý» týrıstik marshrýty arqyly Qaraqııa aýdanyna qarasty «О́nere bulaǵy – Qarynjaryq oıpaty – Býlyoıyq úńgiri – Qyzylkúp shatqaly – Boqty taýy – Senektiń qumy – Bozjyra – Beket ata» marshrýtyna jalǵastyrý kózdelip otyr.
Áleýmettik salany jaqsartý maqsatynda Kendirli aýylynda 50 adamǵa arnalǵan dárigerlik ambýlatorııanyń qurylysy aıaqtaldy, nysan jyl sońyna deıin paıdalanýǵa beriledi.
Jańaózen qalasy men oǵan qarasty aýyldarda 442 kásipkerlik nysan tirkelgen. Kásipkerlikti damytý maqsatynda «Bir aýyl – bir ónim» ulttyq jobasy aıasynda forým men jármeńke uıymdastyrylyp, jergilikti kásipkerler óz ónimderin tanystyrýǵa múmkindik aldy. Nátıjesinde, eki joba fınalǵa shyǵyp, olardyń ári qaraı damýyna arnaıy ǵımarat bólindi.
Jańaózen qalasynda turǵyndar úshin sapaly jol ınfraqurylymyn qurýǵa, turǵyndardyń ómir sapasyn arttyrýǵa baǵyttalǵan 13 joba iske asyrylyp jatyr. Onyń ishinde 8 joba «Aýyl – el besigi», «Monoqalalardy damytý» baǵdarlamalary sheńberinde qolǵa alynǵan. «Aýyl – el besigi» baǵdarlamasy aıasynda Teńge, Kendirli, Qyzylsaı, Rahat aýyldarynda jol salý, jóndeý jumystary júrgizilip jatyr. Sondaı-aq «Monoqalalardy damytý» baǵdarlamasy aıasynda Rahat aýylyndaǵy, Mereı shaǵyn aýdanyndaǵy jol qurylystary qarqyndy júrgizilip, Mańǵystaý oblysynyń 2021–2025 jyldarǵa arnalǵan áleýmettik-ekonomıkalyq damý keshendi jospary aıasynda qalada alǵash ret jastarǵa arnalǵan 350 oryndyq «Bolashaq Sarayi» salynyp jatyr. Jalpy aýdany 3 myń sharshy metrdi quraıtyn bul rýhanııat ortalyǵynda balalar men jastardyń shyǵarmashylyq, tehnıkalyq qabiletterin damytýǵa arnalǵan robottehnıka jáne baǵdarlamalaý, 2D/3D modeldeý, shet tilderi, kıim dızaıny men tigin isi, qolóner, vokal, halyq aspaptarynda oınaý baǵyttary boıynsha arnaıy kabınetter ashý josparlanǵan. «Aýyl – el besigi» baǵdarlamasy aıasynda keler jyly Rahat aýylynda jalpy aýdany 3 474 sharshy metr bolatyn 300 oryndyq zamanaýı mádenıet úıi, Jańaózende qalalyq jastar resýrstyq ortalyǵynyń janynan zamanaýı kovorkıng ortalyǵy ashylady.
Jańalyǵy kóp Jańaózendegi kezdesýde turǵyndar aımaq basshysy N.Qılybaıǵa tolǵandyrǵan máselelerin jetkizip, sheshimin kútken túıtkil isterdi ortaǵa saldy. Halyqtyń basym kópshiligi turǵyn úı, jumyssyzdyq, jol máselesi, kásipkerlik, bilim salasy men úleskerlerge qatysty máselelerdi kóterdi.
Mańǵystaý oblysy