Lenıngradta Qazaqstannyń birinshi áýe kemesi istelip shyqty. Kemeniń baǵasy – 18 myń som, ózi soǵysqa arnalyp istelgen. Sondyqtan Qazaqstannan barǵan komıssııa ony Lenın atyndaǵy áýe keme otrıadyna tapsyrdy.
7–8 mıllıon halqy, basqalardikindeı baılyǵy bar Qazaqstannyń bul syıy áli az. Respýblıka túgil, ishki gúbirnelerdiń árqaısysy bir-bir áýe kemeden tapsyryp otyr.
Bizdiń álde de úkimetimizdi qorǵaý úshin de, sharýamyz úshin de áýe kemelerin jasatýymyz kerek. Áýe kemesiniń sharýashylyǵymyzǵa kerektigi mynaý: Qazaqstannyń eli ydyrandy, temirjol az, sý joly joq, qatynasy qıyn. Egerde qolymyzda 6-7 áýe kemesi bolsa, habarlardy kúnde bilip, gúbirnelermen kúnde qatynasyp, asyǵys jumystarǵa kúnde baryp, pochtalardy oryndarǵa jyldam jetkizip turar edik. Munyń ústine áýe kemesiniń shyǵyny az. Meniń aıtatynym: aımaqtyq mekemelerdegi azamattar áýe kemesin kóbirek istetýdiń qamyna kiriseıik. Gúbirnedegi joldastar, Keńes úkimetin bekitemin, qorǵaımyn, sharýashylyqty jóndeımin deseńder, gúbirne saıyn áýe kemesin istetýge kirisińiz!
Kelińder, kúsh biriktirip, áýe kemesin jasatyp, elimizdi qorǵaıyq, sharýamyzdy jóndeıik!
M.Tátimuly, «Eńbekshi qazaq» gazeti, 14.02.1925 jyl
Daıyndaǵan –
Ushqyn Seıdirahmanuly