Bir ǵasyrdan asa tarıhy bar «Egemen Qazaqstan» gazetin elý jyldan beri úzbeı jazdyrtyp alyp otyramyn. Aptasyna bes ret qolymyzǵa tıetin bas basylym betterinde jarııalanyp turatyn el tarıhyna, ult rýhanııatyna qatysty qundy materıaldardy, búgingi qoǵamnyń qalpy men memleketimizdiń damý baǵytyn tereń taldap, jan-jaqty saraptap, kókeıge sáýle túsiretin salmaqty dúnıe, baısaldy oı, baıypty maqalalardy tushynyp oqımyn.
«Egemen» – eń aldymen eldigimizdiń, birligimizdiń, berekeli tirligimizdiń, el ishinde bolyp jatqan jaqsylyq pen jańashyldyqtyń jarshysy. Osy bıigin áste alasartyp kórmegen bas basylym eldiń kókeıindegi kóptegen túıtkildi máseleniń sheshilýine sep bolyp, ıgi isterge dáneker bolýdan taıǵan emes. Bul oraıda el gazeti shalǵaı aýyldyń muńyn muńdap, qarapaıym jurttyń sózin sóılep, baıypty áleýmettik synnyń bıik minberi bola bildi. «Egemenniń», ásirese, Alash arystarynyń qaıratkerligi men asyl murasyn elge tanyta túsýdegi eńbegi, Ahmetke etken eńbegi ushan-teńiz.
Bıyl 105 jyldyǵyn atap ótip jatqan bas basylymnyń turaqty oqyrmany retinde gazet ujymyna, jalpy oqyrman qaýymǵa qutty bolsyn aıta otyryp, «Egemenniń» eldik joly jalǵasa bersin degen izgi tilegimdi joldamaqpyn.
Ibrahım AǴYTAI,
ahmettanýshy
Qostanaı qalasy
Joldar joldy túzedi
Meniń jasym – 88-de. Qart ustazbyn. «Egemen Qazaqstan» gazetin jazdyryp alyp, oqyp kele jatqanyma jarty ǵasyrǵa jýyqtady. Zaman ózgerisine saı damyp kele jatqan gazet ujymyna sáttilik tileımin. Men sııaqty eki dáýirdiń tynysyn sezgen oqyrmandaryńyz kóbeıe bersin!
Eldiń tynys-tirshiligi, sharýashylyǵy, óneri men mádenıeti, bilimi men densaýlyǵy, tabıǵatty qorǵaý máseleleri túrli taqyryptarmen tuzdyqtalyp, meılinshe qarapaıym da túsinikti etip jazylyp júr. Bas basylym óńirlerdegi kólik joldarynyń jaǵdaıy týraly aýqymdy máseleler kóterip keledi. Osy gazetten elimizdiń soltústigindegi kólik joldarynyń jaıy týraly jazylǵan maqalany súısinip oqydym. Jol kúretamyr dep beker aıtpasa kerek Joly durys eldiń sharýasy da tez ońalady.
Men uzaq jyldan beri Aqtóbe oblysynda 1997 jyly jabylǵan Embi aýdanyn qaıtadan ashý jóninde másele kóterip júrmin. Muǵaljar aýdanyna Oktıabr aýdanyn qosyp, ortalyǵyn Qandyaǵash qalasy dep jarııalanǵan kúnnen bastap, Embiniń kúıi kete bastady. Adamdar kóship ketti, táp-táýir jumys istep turǵan mekemeler jabyldy. Embiniń qazirgi jaǵdaıy maǵan qatty batady. Úkimet shaǵyn qalalardy damytýdy shyndap qolǵa alsa, kúıi ketken Embiniń tamyryna qan júgirer me edi dep úmittenemin.
Ybyraı TEMIRBAEV
Aqtóbe oblysy,
Shalqar aýdany,
Bershúgir aýyly