Jan-janýarlarǵa eliktep, tórt aıaqtynyń keıpine enip, tirlik keship júrgen jasóspirimder kóbeıdi. Bul – Tik-toktan bastalǵan jańa trend. Elikteýshiler qoǵamdyq oryndarda kózge kóp túse bermegenimen, megapolısterde aragidik boı kórsetip júr. Ony áleýmettik jelilerden baıqap qalamyz. Sodan keıin de qoǵamnyń qyzý talqysyna tústi.
Qyzyǵy, tórttaǵandap júrýge áýester muny hobbı sanaıdy. Ustanymyn ata-anasy quptaǵandary da bar kórinedi. Solaısha ómir saltyna aınaldyrǵan. Elikteýdi ersi kórmegender maskasyn óz qoldarymen jasap alyp, unaǵan obrazyna enedi. Jelikpe jastardyń ermeginen paıda taýyp jatqandar da bar. Ony saýda núktelerinen ańǵarýǵa bolady. Qazir janýarlarsha júrip-turamyn degenderge daıyn rekvızıt jetkilikti. Olarǵa arnalǵan arnaıy maskalar saýdada bar. Kvadrobıngke elikteıtinder maskanyń baǵasyna qaramaı saýdasyn qyzdyryp jatqan kórinedi. Búginde jasóspirimderdiń ǵana emes, eresekter tarapynan da suranys artqan desedi.
Adamdardyń tórt aıaqtap júrýine «kvadrobıka» degen ataý qaıdan telindi? Tarıhyn tarqatsaq, kvadrobıka, kvadroberıng uǵymynyń túp-tamyry Kúnshyǵys eline tartady. Bala kúninen tórt aıaqtap júrýdi ádetke aınaldyrǵan japondyq sprınter Kenıtı Ito ıtke eliktegenderdiń bastaýy desek bolady. Ol 100 metrge tórttaǵandap júgirip, gınnestiń rekordtar kitabyna da enipti. Japon balasynyń osy jetistigine tańyrqaǵandar trend qylsa kerek. Bastapqyda Japonııa, keıin Amerıkada kvadrobıkaǵa áýestengender qatary kóbeıgen. Solaı álem aınalǵan elikteýshilik áleýmettik jeli arqyly bizge de jetti.
Al jat jerden jetken jastar hobbıine qatysty psıhologter paıymy san túrli. Oǵash qylyqqa oıyn balalarynyń ýaqytsha áreketi dep baǵa bergen mamandar da bar. Ersi qylyqpen aınalysqan jetkinshek adamı qundylyqtardan alshaqtaı bastaıdy dep alańdaýshylyq bildirgender de az emes. Tik-toktan taraǵan trend balanyń túpsanasyna tamyryn jaımaı turyp, tez arada toqtatý kerek dep paıym aıtqandar da boldy.
Dinı sharıǵatpen júretin memleket bolmasaq ta, dástúr men ımandylyqty teń ustaıtyn halyqpyz. Sondyqtan qoǵamnyń osy jat qubylysqa qatysty ortaq kózqarasy bolýy qajet.
Kvadrobıkanyń qaýpi joǵary minberlerden de aıtyla bastady. Máselen, májilis depýtaty Dáýlet Muqaev óziniń depýtattyq saýalynda máselege mańyz berdi. Májilismen tipti janýarlarsha júrgenderdiń áreketin degradasııa dep dabyl qaqty. Sondyqtan depýtat janýarlardyń qımyl-qozǵalysyn qaıtalaǵandarǵa qarsy kúresti qazir bastap, jetkinshekterdiń jelikpe qylyǵyn zańmen tyıýymyz kerek dep sanaıdy.
Arýjan SERIKJANQYZY,
Shákárim ýnıversıtetiniń 2-kýrs stýdenti