Bekem birlik pen tatý tirlik – táýelsizdik tuǵyryn bıiktetetin qýatty qundylyq. Erkin eldiń erteńi eńseli bolý úshin baýyrmaldyq pen jarasym, ózara túsinistik pen syılastyq saltanat qurýy kerek. Elimiz zaıyrly memleket retinde qazaq jerindegi túrli etnostardyń erkin ómir súrip, dástúri men mádenıetin, tili men dilin saqtaýǵa esh shekteý qoıǵan emes.
Elimizdiń úlken qalalaryndaǵy Dostyq úıleri rýhanı baılanystardyń ortaq alańy retinde azamattar udaıy bas qosatyn, taǵylymdy is-sharalar ótkizetin ortalyqqa aınalǵan. Máselen, Almatydaǵy Dostyq úıinde kúni búgin 19 etnomádenı birlestik jumys istep otyr. Kelýshiler munda til úırenip, túrli is-shara uıymdastyrady, arnaýly úıirmeler arqyly ónerlerin shyńdap, etnostardy ózara yntymaqqa uıystyratyn mańyzdy jobalarda bas qosady. Ortalyqtyń belsendi ókili ári «Úıde sóıle» jobasynyń negizin qalaýshy Aleksandra Myskına – memlekettik tildi erkin meńgergen bilimdi azamattyń biri.
«Barsha otandastarymyzdy Táýelsizdik merekesimen quttyqtaımyn! Qazaqstan – yntymaq pen yrys mekeni. Eldiń bolashaǵyna balanatyn jasóspirimderimiz qazaq halqynyń dástúrin, tilin meńgerýge ynta tanytatyny baıqalady. QHA bastamasymen qazaq tilin úırenýde nátıjeli jumys júrgizilip keledi. Beıbitshilik, birlik, etnostardyń ózara syılastyǵy men dostyǵy – turaqty damyp kele jatqan Qazaqstannyń negizgi tirekteriniń biri. Ony saqtaýǵa bar kúsh-jigerimizdi biriktirý – bárimizge ortaq mindet. Menińshe, adamǵa eń keregi – nıet. Nıet pen ynta bolsa, túrli tildi meńgerip, ozyq mádenıetterdi ıgerip alýǵa bolady. Álemde qansha halyq bolsa, olardyń taǵdyry men tarıhy da san qıly. Ár eldiń ózine tán erekshelikteri, bir-birine uqsamaıtyn mádenı dástúrleri, ómir súrý daǵdysy bar. Qazaqstan tarıhtaǵy túrli kezeńderge tap bolǵan halyqtarǵa qushaq ashty, olardyń ósip-jetilýine, bilim alyp, qoǵamnyń múshesi bolyp qalyptasýyna jaǵdaı jasady. Bizdiń jobada qazaq tilin úırenýge nıet tanytatyndar osyny únemi aıtyp, shynaıy yqylasymen, patrıottyq sezimmen bilim alady», deıdi A.Myskına.
Mamandar Dostyq úıiniń qabyrǵasynda qazaqtyń aıtýly qalamgerleriniń mereıli datalaryna oraı ádebı-sazdy keshter, olardyń shyǵarmashylyq tynysynan syr shertetin taǵylymdy baıqaýlar ótkizý dástúrge aınalǵanyn aıtady. Atap aıtar bolsaq, qazaq ádebıetiniń klassıgi B.Soqpaqbaevtyń 100 jyldyǵyna arnalǵan «Balalar ádebıetiniń báıteregi» atty tanymdyq is-shara, G.Belgerdiń 90 jyldyǵy, Á.Kekilbaev pen F.Ońǵarsynovanyń 85 jyldyǵyna baılanysty mádenı is-shara Jazýshylar odaǵymen birlese uıymdastyrylǵan. Mazmundy jobada túrli etnos ókilderi arasynda aqyn-jazýshylar shyǵarmalary nasıhattalyp, qatysýshylar olardyń ómirine qatysty qyzyqty derektermen tanysqan.
Qazaqstan halqy Assambleıasyna qarasty etnomádenı birlestikter memleket ómirindegi kez kelgen irgeli iste boı kórsetip júr. Aıtalyq, eldegi sý tasqyny kezinde qıyndyqta qalǵan óńirlerge olar da óz álinshe qolushyn sozdy. Almatydaǵy etnomádenı birlestikter apat aımaǵyna 40 tonnadan asa gýmanıtarlyq kómek joldaǵan. Etnomádenı birlestikterge qarasty jastar uıymdary volonterlik bastamalarda udaıy boı kórsetedi. «Taza Qazaqstan» aksııasynda olar myńnan asa kóshet otyrǵyzyp, saıabaqtar men alańdarda tazalyq jumystaryn júrgizgen.
«Bárimizdi toǵystyratyn bir tilek – elimizdiń baıandy bolashaǵy. Osy elde ul-qyzymyz ósip, órken jaıyp kelemiz. Sondyqtan Otannyń mereıi – bárimizdiń mereıimiz. Jyl basynda birqatar aımaqty sý alyp, syn saǵat týǵany málim. Eldigimiz qıyn kezeńde synalady. Batystaǵy, soltústiktegi otandastarymyz baspanasynan aıyrylyp, tosyn apatqa tap bolǵanda qarap otyra almadyq. Aýqatty azamattarymyz bastap, el aǵalary qostap, kómek kórsetýge asyqty. Aqsaqaldarymyz, zııalylarymyz osy iske bastamashy boldy. Birligimizdi osyndaı qysyltaıań sátte kórsetpesek, qashan kórsetemiz. Prezıdentimiz alǵa qoıyp otyrǵan «Bir halyq, bir el», «Adal azamat» tujyrymdamasyndaǵy bastamalar – bizdiń birligimizdi arttyratyn ustanymdar. Jastarymyzdy eńbeksúıgishtikke, otansúıgishtikke baýlýǵa, olardyń rýhanı tárbıesin óristetýge baǵyttalǵan jumystarǵa kóńil bólý mańyzdy. Táýelsizdik kúni ótkenge kóz jiberip, tarıhtan sabaq alatyn, ósip kele jatqan urpaqty izgilikke baǵyttaýǵa serpin beretin biregeı kún», deıdi Qazaqstan uıǵyrlary etnomádenı birlestiginiń tóraǵasy Abdýlhalıl Dolkýntaı.
«Barbang» kúrdter qaýymdastyǵynyń múshesi Mýrad Smaılov Táýelsizdik kúni barsha etnos ókilderi asyǵa kútetin mereke ekenin aıtady. Onyń pikirinshe, elimizdegi etnomádenı birlestikter qoǵamdyq kelisim men jalpyulttyq birlikti nyǵaıtýdyń jańa tetikterin damytý, etnosaralyq ózara is-qımyl arnalary men alańdaryn keńeıtý, qazaq halqynyń Qazaqstan halqy birliginiń tarıhı, saıası jáne mádenı ózegi retindegi ıntegrasııalyq rólin nyǵaıtýda úlken jumys atqaryp otyr.
ALMATY