«Astana Hub» halyqaralyq tehnoparki «IT-Aiel» baǵdarlamasynyń ekinshi legin qorytyndylady. Atalǵan jobanyń ereksheligi – munda IT salasynda eńbek jolyn bastaǵysy keletin arýlar «No code», «Freelance School», sondaı-aq «E-commerce» baǵdarlamalaý baǵyttary men basqa da sıfrlyq daǵdylardy tegin meńgere alady.
Byltyr bastaý alǵan bul baǵdarlama bıyl da jalǵasyn taýyp, 3 myńnan astam áıel IT salasynda bilimin shyńdady. Atalǵan joba 18 jastan asqan qyz-kelinshekterdi, onyń ishinde jumyssyzdardy, dekrettik demalystaǵy áıelderdi, stýdentter men jas kásipkerlerdi qamtıdy. Qatysýshylardyń basym bóligi Batys Qazaqstan óńirinen, Astana, Almaty qalalarynan tirkelgen.
Ekinshi lektiń birqatar tabysty bastamalary bar. Máselen, qyzylordalyq Saǵılıa Saǵıdan «EdKids» atty ońtaıly oqytý platformasyn oılap tapty. Bul qyzmet balalarǵa sapaly bilim usynyp, erte jastan bastap óz daǵdylaryn damytýǵa septigin tıgizedi. Atalǵan baǵdarlama ınteraktıvti oqytýǵa baǵyttalǵan ári keń aýdıtorııaǵa qoljetimdi. Al aqtóbelik Ásel Qarajan mentaldi arıfmetıkaǵa baýlıtyn «AKM Education» mektebiniń sapaly saıtyn ázirledi. Bul mektep balalar men jasóspirimderdiń analıtıkalyq oılaýyn damytýǵa, jady men zeıinin jaqsartýǵa kómektesip, zamanaýı oqytý tásilderin usynady. Astanalyq Merýert Jarylqasynova da jobada jarqyn nátıje kórsetip, «Qadam» mobıldi qosymshasyn iske qosty. Bul ónim kásipkerler men startap ıelerine qoljetimdi granttar men qoldaý baǵdarlamalary týraly málimetterdi ońaı izdep, ótinim berýge óte yńǵaıly. Al almatylyq Aıdana Sembaeva «Telegram» jelisinde jıi qoıylatyn suraqtarǵa jedel jaýap beretin aqyldy chatbot ázirledi. Bul bıznes-úderistiń tıimdiligin arttyrady.
«Astana Hub» basqarýshy dırektory Danııa Ahmetovanyń aıtýynsha, jobaǵa qatysýshylar sany jyl saıyn artyp keledi.
«IT salasynda bilimin shyńdaý maqsatynda byltyr IT-Aiel baǵdarlamasyna elimizdiń 17 óńirinen 2634 áıel ótinim berdi. Olardyń qatarynda 900-den astam jumyssyz, 500 stýdent, 700 ózin-ózi jumyspen qamtyǵan qyz-kelinshek, sondaı-aq 400-den astam dekrettegi ana boldy. Birinshi lek túlekteri veb-saıttar men qosymshalar sııaqty óz IT-ónimderin meńgerdi. Osylaısha, olar qarjylyq táýelsizdik pen kásibı shyńdalýǵa mańyzdy qadam jasady. Máselen, Álııa Orazymbetova balalar men jasóspirimder arasyndaǵy sıfrlyq gıgıena jáne kıberbýllıngtiń aldyn alý týraly bot-kómekshi «CyberBala» jobasyn ázirledi. Osyndaı mysaldy myńdap keltirýge bolady. Bıyl da baǵdarlama barysynda áıelder tabysty mansap quryp, qoǵamnyń damýyna úles qosýǵa septigin tıgizetin jańa múmkindikterge qol jetkizdi», dedi ol.
Jobanyń ekinshi legi aıasynda usynylǵan kýrs mazmuny: veb-saıttar, mobıldi qosymshalar, chatbottar men basqa da kod jazýdy qajet etpeıtin sıfrlyq ónimder qurýǵa arnalǵan «No Code School», qashyqtan jumys isteýge, óz baǵytyn tańdaýǵa, qyzmetterdi satýǵa jáne klıentterdi tartýǵa arnalǵan «Freelance School», maqsatty jarnamany ázirleýge, áleýmettik jelide paraqshalar júrgizýge, ınternet-dúken ashýǵa, halyqaralyq onlaın-alańdarda taýarlar satýǵa, onlaın-tólemderdi qosý men kıberqaýipsizdik negizderine úıretýge arnalǵan «E-commerce» baǵdar-lamalarynan quralǵan.
«IT-Aiel 2.0» jobasyn Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, «Astana Hub» halyqaralyq tehnoparki jáne «TechnoWomen» kommersııalyq emes uıymy júzege asyryp keledi. Ulttyq komıssııanyń qoldaýymen qyzdar men áıelderdi IT salasyna baýlýǵa, olardyń startaptaryn qoldaýǵa baǵyttalǵan «TechGirls», «IT-Aiel» sııaqty jobalar jyl ótken saıyn qarqyndy ilgerilep keledi.