Táýelsizdik kúni qarsańynda L.N.Gýmılev atyndaǵy Eýrazııa ulttyq ýnıversıtetinde kommersııalandyrý áleýeti bar úzdik jobalar baıqaýynyń jeńimpazdary «Jańa asý» grantyna ıe boldy.
Bul grantty oqý orny 2022 jyly taǵaıyndaǵan. Bıyl baıqaýǵa ýnıversıtettiń úsh myńnan astam oqytýshysy, doktoranttary men postdoktoranttary qatysty. Sóıtip, ýnıversıtettegi dırektorlar keńesiniń táýelsiz dırektory, belgili kásipker, ınvestor Talǵat Dúısekov basqarǵan komıssııa jalpy quny 84 mıllıon teńgeni quraıtyn 10 jobany anyqtady.
«Qazir Memleket basshysy tarapynan ǵylym men ǵalymdardy jan-jaqty qoldaý udaıy artyp keledi. Bir jaǵynan, otandyq ǵylym aldynda ǵalymdardyń ınnovasııalyq ázirlemelerin kommersııalandyrý jáne olardy ekonomıkaǵa engizý mindeti tur. Bul – ortaq maqsat. Sondyqtan eki jyl buryn EUÝ zertteýshilerin qoldaý baǵytynda «Jańa asý» granty taǵaıyndaldy. Bıylǵy baıqaýǵa 36 joba qatysyp, onyń 10-y úzdik dep tanyldy. Onyń ishinde energetıka, mıkrobıologııa, ekologııa salasyna arnalǵan jobalar bar. Endi budan ári de bıznes-ıdeıalardy, kommersııalandyrý bolashaǵy bar jobalardy damytyp, ǵalymdardy jan-jaqty qoldaýǵa barlyq jaǵdaı jasaımyz», dedi ýnıversıtet rektory Erlan Sydyqov.
Odan keıin sóz alǵan EUÝ ǵylym jáne kommersııalandyrý jónindegi prorektory Janna Qurmanǵalıeva eki jyl ishinde «Jańa asý» granty ǵylymı-tehnıkalyq qyzmet nátıjelerin kommersııalandyrýdy qoldaýdyń tabysty quraly bolǵanyn jetkizdi.
«Bastapqyda 3 mıllıon teńgeni quraǵan bul granttyń alǵashqy ıegerleriniń keıbiri búginde 150 mıllıon teńge tabys deńgeıine jetkeni qýantady. Meniń oıymsha, bul fakt ǵylymdy qajet etetin bıznesti qalyptastyrýǵa eń az ınvestısııalardyń da joǵary nátıjeliligin aıqyn kórsetedi. Otandyq ǵalymdar men olardyń ázirlemeleriniń áleýetine sený kerek», dedi ol.
Jańa grant ıegeri, EUÝ mehanıka-matematıka fakýltetiniń doktoranty Aıdana Káripova jasóspirim qyzdarǵa arnalǵan «Sezin» mobıldi qosymshasyn ázirlegen.
«Bul – elimizdegi qazaq tilindegi alǵashqy mobıldi qosymsha. Onda qyzdardyń jeke damýyna baǵyttalǵan bilim mazmuny bar (elektrondyq kitaphana, onlaın oqytý kýrstary, sulýlyq blogi, laıfhaktar, t.b.). Men osy jobaǵa avtorlyq quqyq patentin bir jarym jyl buryn aldym. Qosymsha jasaý ıdeıasy mektepte oqyp júrgende oıyma keldi. О́zim aýyl mektebinde bilim aldym. Sonda men qyzdarǵa mundaı aqparattyq qoldaýdyń qanshalyqty qajet ekenin túsindim. Meniń maqsatym – kez kelgen qıyndyqqa tap bolǵan árbir boıjetkenge kómektesý, qoldaý kórsetý», dedi joba avtory.
Al L.N Gýmılev atyndaǵy EUÝ ekologııa kafedrasynyń 3-kýrs doktoranty Medet Ahtaev kómirtegi shyǵaryndylaryn azaıtyp, otyndy únemdeýge sýtegi otynyn generasııalaý júıesin engizý biregeı ǵylymı jobasymen aınalysady.
«Biz bul ıdeıany eki salada synap kórdik. Jobanyń biregeıligi sol, álemdik analogter jańa jabdyqtarǵa arnalǵan bolsa, bizdiń ázirlemelerdi otandyq óndiristegi qazirgi dızeldik jabdyqqa engizýge bolady. Bolashaqta joba elimizdiń aýyr ónerkásibine orasan paıda ákeledi dep senemin», deıdi doktorant.
Sondaı-aq baıqaýda Fızıka-tehnıkalyq ǵylymdar ınstıtýtynyń (FǴZI) doktoranty Azat Nurqasımovtyń «Oń temperatýralyq koeffısıenti bar polımerli kompozıt negizindegi otandyq ózin-ózi retteıtin jylý kábilin óndirý tehnologııasyn qurý», Jaratylystaný fakýlteti doktorantýrasynyń ǵylymı qyzmetkeri Nurgúl Yqsattyń «Aýyl sharýashylyǵy daqyldarynyń vırýstyq aýrýlaryn dıagnostıkalaýdyń RNQ tehnologııalaryn ázirleý jáne zertteý», Mehanıka-matematıka fakýltetiniń oqytýshysy Dáýren Baltabaıdyń «Ártúrli maqsattaǵy robot-manıpýlıatorlardyń 3D úlgilerin jasaý jáne baǵdarlama jasaý», Ekonomıka fakýltetiniń doktoranty Araı Eseıqyzynyń «Daneqer» jobasyn basqarýǵa arnalǵan baǵdarlamalyq modeldeý oıyny», Fılologııa fakýltetiniń dekany Serikzat Dúısenǵazynyń «Tanymal sheteldik mýzykalyq shyǵarmalar mádenıetiniń qazaq tilinde jańǵyrýy: án men til toǵysy», taǵy basqa jobalar jeńiske jetti.