Aqmola óńiriniń týrızmge qolaıly aýdandary kóp. Oǵan eldi mekenderdi damytýǵa jaýapty mınıstrlik, jergilikti ákimdikpen qosa turǵyndar da múddeli. Sebebi týrızm damysa, jergilikti halyqtyń áleýmettik-ekonomıkalyq ahýaly arta túsetinin jurt jaqsy biledi. Tek tabıǵattyń úıip-tógip bergen baılyǵyn baǵalap, qyzǵyshtaı qoryp, qadirlep, tıimdi paıdalana bilý kerek.
Osyny elep-eskergen jergilikti ákimdik Aqmolanyń aýdandarynda turaqty týrızmdi damytýǵa kóp kóńil bólip keledi. Halyqaralyq týrıstik uıymdar, sarapshylar da týrızmniń dál osy baǵytyn damytyp tabysqa kenelýge bolatynyn aıtady. Oǵan árıne, kórikti, tarıhı oryndarǵa tóte aparatyn ınfraqurylym, jaıly jatyn oryn, qaýipsiz orta, sodan soń jarnama qajet. Osynyń barlyǵyn úılestirer kezde, turaqty týrızmniń talabyna saı, saıahattyń qorshaǵan ortaǵa, mádenıet oryndaryna, destınasııalarǵa zalaly tımeıtinine kóz jetkizgen durys.
Týrızmniń baıypty bir baǵyty – jergilikti halyq kıe tutqan eldi mekenderdi aralaý. Darqan dalamyzda kóneden qalǵan áýlıeli jerler, jádigerler kóp. Sol mekenderge baılanysty ańyz-áńgime, jyr-dastan da jeterlik. Kópshilik bile bermeýi múmkin, bir Kókshetaýdyń ózi tarıhı muralarǵa sonshalyqty baı. Biraq arheologııalyq núkteleri ázirge barshaǵa esigin aıqara ashqan joq. Sáti túskende olar da kóptiń ıgiligine usynylady. Aqmola oblysynyń týrızm salasyndaǵy artyqshylyǵy, basym baǵyttary týraly oblys ákiminiń orynbasary Ernar Járkeshov:
– Aqmola – kólemi jaǵynan eldegi iri oblystardyń biri. Aımaqta tartymdy týrıstik baǵyttar barshylyq. Mysaly, «Qorǵaljyn qoryǵy» memlekettik ulttyq tabıǵı parki. Qoryqqa kúlgin flamıngony tamashalaýǵa baratyndar sany óte kóp. Qorǵaljyn aýdany jaǵynan eldegi iri qoryqtardyń qatarynda. Qazir park jan-jaqty damyp, kórkeıip keledi. Memlekettik mańyzy bar jobalar iske asyp jatyr. Taǵy bir aıta keter jaıt, biz óńirdegi qaı ólkeni damytsaq ta, ondaǵy tabıǵat baılyǵyn, salt-dástúrin, tarıhı murasyn saqtap qalýdy qaperde ustaımyz. Sol oraıda parkterde elektromobılderdi qoldaný máselesin oılastyryp jatyrmyz. Býrabaıda 5, 4 juldyzdy qonaqúıler bar. Uzyn sany 3000 jatyn orny qarastyrylǵan. Ulttyq park aýmaǵynda 30 ekskýrsııalyq marshrýt belgilengen. Onyń ishinde taýǵa shyǵý, atpen serýendeý, jaıaý serýendeý bolyp jalǵasa beredi, – deıdi.
Kókshetaýdan bólek, oblystaǵy Zerendi, Sandyqtaý, Qorǵaljyn, Ereımentaý, Aqkól aýdandarynyń tańǵajaıyp tabıǵatyn jurtshylyq talmaı tamashalap keledi. Degenmen búginde týrısterdi tek tabıǵaty kórkem ólkelermen ǵana qyzyqtyrý qıyn. Sondyqtan óńirmen tikeleı baılanysty tarıhı oryndardy, qundy derekterdi durys nasıhattap, usyna bilý qajet. Qazir Prezıdent Qasym-Jomart Toqaevtyń tapsyrmasymen negizgi týrızm aımaqtaryn damytýǵa kóp kóńil bólinip jatyr. Arnaıy joba ázirlengen. Bıýdjetten qarjy qaralady. Munyń barlyǵy týrızm salasyn, soǵan qatysty ınfraqurylymdy, logıstıkany jan-jaqty damytýǵa múmkindik beredi.
Jalpy, Aqmola oblysyn tutas alar bolsaq, týrızmniń basqa da baǵyttaryn jandandyrýǵa múmkindik bar. Kúndelikti kúıbeń tirshilikten sharshaǵanda, qala mańyndaǵy keıbir aýyldarǵa birneshe kúnge baryp, demalýǵa bolady. Otbasylyq demalysqa qolaıly oryndar jetkilikti. Qysqasy, týrısterge kórkimen de, tarıhymen de tartymdy jerler az emes.