Mádenıet, óner jáne medıa salasynyń ókilderi Astanada uıymdastyrylǵan «QazaqSham» forýmynda bas qosty. Is-shara barysynda otandyq kreatıvti ındýstrııany damytýǵa, qazaqtildi kontent jasaýmen aınalysatyn jas talanttardy qoldaýǵa jáne salany ınfraqurylymmen qamtamasyz etýge qatysty máseleler talqylandy. Bıbigúl Tólegenova atyndaǵy kreatıvti mektepte ótken forýmǵa Parlament Senatynyń tóraǵasy Máýlen Áshimbaev jáne bir top depýtat qatysty.
Máýlen Áshimbaev qatysýshylarǵa iltıpat bildire kelip, Memleket basshysy Qasym-Jomart Toqaevtyń tapsyrmasymen elimizde kreatıvti ındýstrııany damytý úshin júıeli qadamdar jasalyp jatqanyn atap ótti.
– Prezıdentimiz Qasym-Jomart Toqaev elimizde kreatıvti ındýstrııany damytýǵa qatysty naqty mindetterdi belgilep berdi. Búginde osy baǵytta aýqymdy jumys atqarylyp jatyr. Sonyń aıasynda elimizde alǵash ret Kreatıvti ındýstrııany qoldaý qory qurylatyn boldy. Sondaı-aq Memleket basshysynyń tapsyrmasymen salaǵa qajetti ınfraqurylymdy damytý, onyń ishinde birqatar kreatıvti ortalyq ashý jumystary da júıeli júrgizilip keledi, – dep palata spıkeri múddeli taraptardy otandyq kreatıvti ındýstrııany damytý jolynda birlesip áreket etýge shaqyrdy.
Forýmǵa qatysýshylar sıfrlyq tehnologııalardy engizýge qatysty bastamalardy, sondaı-aq óner ókilderiniń bilim berý, densaýlyq saqtaý, qutqarýshylar jáne basqa da salalardyń mamandarymen birlesken jobalaryn talqylady. Odan bólek, talanttardy izdep, olardyń ónimderi men qyzmetterin eksporttaýǵa járdem beretin Kreatıvti ındýstrııany qoldaý qory aıasyndaǵy birlesken jumys barysy sóz boldy.
Sonymen qatar Senat tóraǵasy kreatıvti sektordyń ekonomıkalyq áleýeti jyl ótken saıyn artyp kele jatqanyn tilge tıek etip, álemdik trendterge jáne otandyq kontentmeıkerler nazar aýdarýǵa tıis mańyzdy máselelerge toqtaldy. Onyń aıtýynsha, ulttyq qundylyqtardy dáripteý isinde shyǵarmashylyq sektor mańyzdy ról atqarady.
– Kreatıvti sektor – ulttyń mádenıeti men qundylyqtaryn dáripteýdiń zamanaýı tásili. Búgingideı syn-qaterler jaǵdaıynda ulttyq erekshelikti saqtap, damytýdyń mańyzy zor. Bul rette daıyndalatyn kontentterdiń mazmuny aıryqsha ról atqarady. Zertteýlerge súıensek, qazir jastar sheteldik emes, otandyq kontentti kóbirek paıdalanǵandy jón sanaıdy. Bul sizder sııaqty kreatıvti ındýstrııa salasynda jáne sıfrlyq ortada júrgender úshin jaqsy múmkindik ekeni sózsiz, – dedi M.Áshimbaev.
Ol osy turǵyda Bıbigúl Tólegenova atyndaǵy kreatıvti mekteptiń mıssııasy óńirlerden kelgen daryndy azamattarǵa qoldaý kórsetýdi jáne olardyń jobalaryn ilgeriletýge, áleýeti men talantyn ashýǵa yqpal etýdi kózdeıtinin atap ótti.
– «QazaqSham» forýmynyń Bıbigúl Tólegenova atyndaǵy kreatıvti mektepte ótýi tegin emes. Sebebi Bıbigúl Tólegenova – ózi de, óneri de ultymyzdyń maqtanyshyna aınalǵan dara tulǵa. Onyń kópqyrly shyǵarmashylyǵy elimizben birge álemdik deńgeıde de joǵary baǵalanady jáne jas talanttarǵa árdaıym baǵyt-baǵdar kórsetip turady. Sondyqtan Forýmnyń osyndaı óner ıesiniń atymen atalatyn kreatıvti mektepte uıymdastyrylýynyń sımvolıkalyq máni zor dep qabyldaımyz, – dedi M.Áshimbaev.
Aıta keteıik, Bıbigúl Tólegenova atyndaǵy kreatıvti mekteptiń ereksheligi – akademııalyq jáne kásibı daǵdylardy damyta otyryp, dýaldy bilim alý múmkindiginiń bolýy. Munda dástúrli baǵyttar men sońǵy tehnologııalyq keńistikterdi qosa alǵanda, tórt fakýltet jáne 40 taqyryptyq kabınet jumys isteıdi. Olar – dybys jazý stýdııasy, sán dızaıny zerthanasy, ART galereıa, anımasııalyq stýdııa, oıyn zerthanasy, vırtýaldy shynaıylyq jáne jasandy ıntellekt kabınetteri. Buǵan qosa STEM zerthanasy, 3D modeldeý, robottehnıka jáne basqa da mamandandyrylǵan zaldar bar.
Forýmǵa Halyqaralyq «Qazaq tili» qoǵamynyń prezıdenti Raýan Kenjehanuly, «Tan Media Group» dırektorlar keńesiniń tóraǵasy Armanjan Baıtasov, «Phenomenal Kids» jobasynyń negizin qalaýshy Azat Ábiken, «Balafunny» YouTube-arnasynyń negizin qalaýshy Altynaı Esenjanova jáne kreatıvti ındýstrııa salasynyń basqa da ókilderi qatysty.