Jyl sońyna deıin Ertis-Baıan óńiriniń aýyldarynda jańadan 30 emdeý mekemesi iske qosylady. Nátıjesinde, 15 myńnan asa adam sapaly medısınalyq qyzmetke qol jetkizedi.
Jaqynda Maı, Aqtoǵaı aýdandarynda emdeý mekemeleri ashyldy. Bul – «Aýyldyq densaýlyq saqtaý salasyn jańǵyrtý» jalpyulttyq jobasyn, Prezıdent Qasym-Jomart Toqaevtyń saılaýaldy baǵdarlamasyn júzege asyrý aıasynda boı kótergen jańa medısınalyq mekemeler.
– Maı aýdanynyń Aqjar aýylyndaǵy feldsherlik pýnktke 500-den asa adam qarala alady. Jańa qural-jabdyqtardyń arqasynda medısınalyq qyzmet kórsetý aıasy keńeıdi. Mekemege EKG jazýǵa arnalǵan telekardıograf, defıbrıllıator, tynys alý joldarynyń aspırasııasyna arnalǵan elektr sorǵysh qurylǵy, kóktamyrishilik ınfýzııaǵa arnalǵan shprısti ınfýzııalyq sorǵylar satyp alyndy. Buǵan qosa fızıoemdeýde qoldanylatyn nebýlaızer, joǵarǵy tynys joldaryn, qulaq qýysyn emdeýge arnalǵan ýltrakúlgin sáýlelendirgish, BTL magnıttik terapııa apparaty da jańartyldy. Munda em-shara, fızıoterapııa, pasıentterdi qabyldaýǵa, dárihanaǵa arnalǵan tórt kabınet, kúndizgi stasıonar bar, – dep habarlady óńirlik densaýlyq saqtaý basqarmasynan.
Aqjardaǵy eski medısınalyq pýnkt 1985 jyly salynǵan. Ǵımaraty ábden eskirip ketkeni sebepti emdeý nysanyn jańadan turǵyzýǵa sheshim qabyldanǵan. Qurylysyna 137 mln teńge jumsaldy. Mundaı múmkindikke oblystaǵy eń shalǵaı aýyldyń biri – Shuǵa eldi mekeniniń halqy da ıe boldy. Jańa mekeme 144 adamǵa qyzmet kórsetedi. Qurylysyna shamamen 138 mln teńge jumsalǵan.
– Merdiger «Bays Group» JShS nysandy ýaqtyly salyp shyqty. «Aýyldyq densaýlyq saqtaýdy jańǵyrtý» ulttyq baǵdarlamasy aıasynda mundaı medısınalyq pýnkt Shilikti aýylynda da turǵyzylyp jatyr. Shuǵada munyń aldyndaǵy medısınalyq pýnkt jaldamaly ǵımaratta ornalasqan edi. Jergilikti turǵyndarǵa sapaly qyzmet kórsetýge qajet defıbrıllıator, EKG apparaty, fızıo jabdyǵy, basqa da qajetti qural-jabdyqtar jetkizildi. Sonymen qatar em-shara, ekpe salý kabınetteri jumys isteıdi, – deıdi Aqtoǵaı aýdandyq ishki saıasat jáne tilderdi damytý bóliminiń basshysy Darhan Ramazanov.
Bıyl Aqtoǵaı aýdanyna 5 dáriger, 10 orta býyndy medısınalyq qyzmetker keldi. Olar jergilikti medısınanyń kadrlyq áleýetin kúsheıtip, densaýlyq saqtaý salasyndaǵy sapany jaqsarta túsedi degen senim zor.
Pavlodar oblysy