QR Ishki ister mınıstrligi kıberqylmysqa qarsy is-qımyl departamenti men Qaraǵandy oblysy polısııa departamenti júrgizgen jedel-izdestirý is-sharalarynyń nátıjesinde jaqyn shet elderdiń biriniń 22 jastaǵy azamaty ustaldy, dep habarlaıdy Egemen.kz Polisia.kz-ke silteme jasap.
Ustalǵan azamatqa uıaly baılanys abonenttik qurylǵylarynyń ıdentıfıkasııalyq kodtaryn zańsyz ózgertip, azamattardy aldaý maqsatynda paıdalanǵan degen aıyp taǵylǵan.
«Tintý barysynda dybys kúsheıtkish retinde jasyrylǵan arnaıy qural-jabdyq tárkilendi. Bul qural Qazaqstan Respýblıkasy azamattaryna bankter men quqyq qorǵaý organdarynyń qyzmetkerleri atynan qońyraý shalyp, aldaý jáne alaıaqtyq áreketter jasaý úshin paıdalanylǵan», delingen habarlamada.
Sonymen qatar kúdiktiniń jaldamaly páterinen 2100-den astam sim-karta, eki noýtbýk, eki mobıldi telefon, planshet tabylǵan. Tárkilengen qural-jabdyqqa qatysty 48 abonenttik nómirden azamattarǵa qońyraýlar jasalǵany anyqtalǵan.
Qazirgi tańda kúdiktiniń basqa alaıaqtyq epızodtarǵa qatysy bar-joǵy tekserilip jatqandyǵy habarlandy. Atalǵan fakt boıynsha qylmystyq is qozǵalǵan. Kúdikti prokýratýranyń kelisimimen qamaýǵa alynǵan.