Az da, kóp te dep aıtýǵa bolmas, keler kóktemde, Orynbasar áje Qudaı qalasa, 90 jasqa tolady eken. Kópti kórgeni ras. Zamandastary tárizdi erte eseıgenderdiń biri boldy. Bes-alty jasynda ákesiniń qasynda júrip, egin jınaýǵa kómektesti. Búgingilerdi sendirý qıyn bolsa da, ómirdiń aqıqaty sondaı edi. On bes-on altyǵa kelgende, «Artelge» resmı túrde «Tiginshiniń úırenýshisi» bolyp jumysqa ornalasty. Sodan qashan zańdy eńbek demalysyna shyqqansha tynym tapqan joq.
Jıyrmaǵa jete bergende Omarǵalı esimdi azamatpen qosylyp, kelin atandy. On balany dúnıege ákeldi, úsheýi qaıtys bolyp ketti. Qazir 20-nyń ústinde nemere, 30-dan astam shóbere súıgen baqytty Orynbasar áje Mızambaevanyń ómirde umytylmas sátteriniń biri – Qanysh Sátbaevty kózi kórgeni ǵana emes, sol uly adamnyń aıaly alaqanymen óziniń mańdaıynan sıpap, batasyn bergeni. Bul bylaı bolǵan edi.
«Toǵyz-on jastaǵy kezim edi. Úıimiz Jezdide turatyn. О́ıtkeni marganes keni tabylyp, jaqyn mańdaǵy aýyldardyń adamdary kenishke jumysqa turyp jatty. Sonyń biri – bizdiń úı. Qanysh aǵany kún saıyn kórip turatyn edik. Birde men ol kisige mıneraldar salatyn shaǵyn qalta tigip aparyp berdim. Keremet rıza bolyp qaldy. «О́rkeniń óssin, aınalaıyn!» dep mańdaıymnan sıpap, batasyn berdi. Al mundaı sát umytyla ma?» deıdi Orynbasar ájeı.
Keıin ájeniń qosaǵy Omarǵalı aǵa Qanekeń basqaratyn geologııalyq partııada sharýashylyq meńgerýshisi bolyp eńbek etti. «Sol shaqtarda Qanysh Imantaıuly, Álkeı Marǵulan tárizdi ultymyzdyń uly adamdary shańyraǵymyzǵa jıi keletin, dastarqanymyzdan dám tatatyn. Men bir balamdy Álkeı atamyz kelgende bosanyp, sol kisiniń qurmetine Marǵulan dep ataǵanmyn» dep eske alady ájeı.
Qazir sol Marǵulannyń qolynda turatyn Orynbasar ájeıge mektep oqýshylary jıi qonaq bolyp keledi. О́ıtkeni olar ájelerinen keshegi kúnderdiń tarıhyna qatysty estelikterin tyńdaıdy.
Jaqynda ájeıge «№6 tirek mektebi resýrstyq ortalyǵy» janyndaǵy «Murager» ólketaný mýzeıiniń jetekshisi Gúljanat Abylaeva bastaǵan «Jas zertteýshiler» klýbynyń músheleri qonaqqa keldi. Olar ájáıge keıingi jyldary jaryq kórgen «О́zbekáli jáne mádenı maıdan», «Qanysh jáne ǵylymı maıdan» kitaptaryn syıǵa tartty. Balalardyń mundaı syılyǵyn ájeı qýana qabyldady.
«Ázir kózimnen qala qoıǵan joqpyn, jaqsy kitaptar ákelipsińder, rahmet aınalaıyndar. Uly tulǵalardyń ómir joldaryn úlgi tutyńdar, bilimge umtylyńdar», degen ájeı balalarǵa batasyn berdi.
Uly Qanysh Sátbaevtyń batasy daryǵan, ósip-óngen, úlgili shańyraqtyń otanasy atanǵan ájeniń batasyn ıelený de bile bilgenge zor baqyt emes pe? Ásirese Qanysh atalarynyń bıylǵydaı mereıtoıy tusynda...
Ulytaý oblysy