Sharýalardy qoldaý jalǵasady

«Bıyl alǵash ret kóktemgi egin egý men kúzgi jıyn-terim jumystaryn qar­jylandyrý erte bastaldy. Bul – fer­merlerdiń tuqym men tyńaıt­qysh­tar­dy aldyn-ala satyp alýyna jáne tehnıkalaryn erte daıyndaýlaryna múmkindik beredi. Buryn-sońdy bolmaǵan mundaı múmkindik memlekettik qoldaý sharalary men naryq kózderinen qarajat tartýdyń arqasynda iske asyrylyp jatyr», dep atap ótti «Agrarlyq nesıe korporasııasy» AQ basqarma tóraǵasy Almat Áshirbekov.

Bıyl «Agrarlyq nesıe korporasııasy» kóktemgi egin egý men kúzgi jıyn-terim jumysyna 320 mlrd teńge bólgen bolatyn. Bul aldyńǵy jyldary berilgen 140 mlrd teńgemen salystyrǵanda áldeqaıda joǵary kórsetkish. Prezıdent tapsyrmasyn oryndaý aıasynda Úkimettiń qoldaýymen 2025 jyldyń kóktemgi egin egý men kúzgi jıyn-terim jumysyna 700 mlrd teńgege jýyq qarjy bólinetin bolady. Onyń 560 mlrd teńgesine jýyǵyn «Báıterek» UBH» AQ men «Agrarlyq nesıe korporasııasy» naryqtyq kapıtal kózderinen tartady. Bıyl jyl sońyna deıin ıgerý úshin 100 mlrd teńge qarjy bólinip, fermerlerge berilip jatyr.

Aýyl sharýashylyǵy taýaryn óndirý­shiler memlekettik qoldaý shara­larynyń arqasynda barynsha qolaıly jaǵdaıda jedel qarjylyq qoldaýǵa ıe bolady. Sonymen qatar nesıeni rásimdeý, keıin óteý kezinde fermerlerge yńǵaıly bolý úshin olar júginetin qarjy ınstıtýttarynyń sany artyp keledi. Máselen, nesıeni ekinshi deńgeıli bankter, nesıelik seriktestikter, áleýmettik-kásipkerlik korporasııalar arqyly jáne «Agrarlyq nesıe korporasııasynan» rásimdeýge bolady.

Aıta keteıik, fermerler úshin «Keń dala 2» baǵdarlamasy boıynsha jeńil­detilgen syıaqy mólsherlemesi jyldyq 5% deńgeıinde saqtaldy. Sondaı-aq kóbine agroónerkásip kesheniniń sýbektileri nesıe qarajatyn alar kezde kepildiginiń jetispeýshiligi problemasyna tap bolady. Bul máseleni aýyl sharýashylyǵy salasynyń barlyq kásipkeri men qoǵamdyq uıymdar aıtyp keledi. Memlekettik qoldaý tetigine sáıkes, «Keń dala 2» baǵdarlamasy boıynsha qaryz somasynyń 85%-yna «Damý» kásipkerlikti damytý qory kepildik beredi.

Batys Qazaqstan oblysyndaǵy «Jańa álem» sharýa qojalyǵynyń basshysy Anatolıı Kan da «Keń dala 2» baǵdar­lamasy boıynsha alǵashqylardyń biri bolyp nesıe alǵan. Ol erte berilgen nesıeniń tıimdiligin aıtty.

«Alǵashqylardyń biri bolyp nesıe aldym. Bul qarjyǵa aldymen tuqym satyp alamyn. Bıyl «Keń dala 2» baǵdarlamasy erte bastaldy. Bul fermerlerge óte yńǵaıly boldy. Janar-jaǵar maı, tuqym, tyńaıtqysh, tehnıkany qys boıy qamdap, egin egý naýqanyna saqadaı-saı daıyndalamyz. Bul baǵdarlamanyń artyqshylyǵy – nesıe tikeleı 5%-ben berilip jatyr. Fermerler sýbsıdııa alamyz dep eshqaıda sabylmaıdy. Onyń ústine, kepil múligi jetpeıtin sharýalar «Damý» kásipkerlikti damytý qorynyń 85% kepildigin alady. Iаǵnı fermer alatyn somasynyń 15%-yna kepildik qoısa bolǵany. Bul – úlken memlekettik qoldaý», deıdi Anatolıı Kan.

Máselen, «Aıbolat» sharýa qojalyǵy 154 gektar jerge dándi daqyl egedi. Sharýa bıyl memlekettik qoldaýdyń arqa­synda jerin daıyndap, qajetti tuqym men tyńaıtqyshtar alǵan. Bitik shyqqan egin esebinen «Agrarlyq nesıe kor­porasııasynyń» aldyndaǵy qaryzyn ýaqytynan buryn óteýge múmkindik týǵanyn aıtady. Endi kóktemge «Keń dala 2» baǵ­darlamasymen taǵy qarjy alyp, qar jaýmaı qamdanyp otyr.

«Keń dala 2» baǵdarlamasy boıynsha nesıe berý erte bastalǵany sharýalarǵa óte tıimdi bolyp tur. Sebebi dızel otynyn, tuqymdy, tyńaıtqyshtar men zııan­kesterge qarsy sebetin dárilerimizdi erterek satyp alatyn boldyq. Eger kóktemge qalatyn bolsaq, olardyń baǵasy qymbattap ketetin edi. Qazir arzan kezinde satyp alýymyzǵa múmkindik bar. Bul biz sııaqty egin egetin sharýalarǵa úlken qoldaý», deıdi Shymkenttegi «Aıbolat» sharýa qojalyǵynyń basshysy Bekbolat Kúzembaev.

Keńes alý úshin jáne «Keń dala 2» baǵ­­dar­lamasyna ótinim berý úshin «Agrarlyq nesıe korporasııasynyń» aımaqtardaǵy fılıaldaryna barý qajet. Qosymsha aqparatty Agrocredit.kz saıtynan alýǵa bolady jáne Kcell, Activ, Beeline abonentteri úshin 5353 Call center nómiri, Tele 2, Altel úshin 8 701 006 19 91 telefon nómiri jumys isteıdi.